میونسپل کارپوریشن کے 2 وارڈوں میں امیدواروں کے انتقال کی وجہ سے پولنگ ملتوی
نئی دہلی ،23؍اپریل (ایس او نیوز؍آئی این ایس انڈیا )دہلی میں 2 وارڈوں پر دو امیدواروں کے انتقال کی وجہ سے میونسپل کارپوریشن کے انتخابات کو ملتوی کر دیا گیا ہے۔جن دو وارڈوں پر الیکشن ملتوی کیا گیا ہے ،ان میں مشرقی دہلی میں موج پور اور شمالی دہلی میں سرائے پیپل ہیں۔دونوں امیدوار سماجوادی پارٹی کے تھے۔دہلی اسٹیٹ الیکشن کمیشن کے ایک سینئر افسر نے کہاکہ 2 وارڈوں پر انتخابات ملتوی کر دئیے گئے ہیں۔موج پور میں اب 14؍مئی کو پولنگ ہوگی جبکہ سرائے پیپل میں 21؍مئی کو پولنگ ہوگی۔دہلی سماجوادی پارٹی کے ریاستی ترجمان آر ایس یادو نے کہاکہ دونوں امیدواروں کی عمر 40سے 45سال کے درمیان تھیں۔موج پور سے ہماری امیدوار ایک خاتون تھیں، جن کی فطری موت ہوئی، سرائے پیپل سے ہمارا امیدوار ایک مرد تھا، جن کی صدمے سے موت ہو گئی۔بہر حال، یادو نے کہا کہ اس سے انتخابات میں پارٹی کی کارکردگی پر کوئی اثر نہیں پڑے گا۔سماجوادی پارٹی نے ان انتخابات میں اسٹار کمپینرو ں کے طور پر اپنے بڑے لیڈروں کو اتارا تھا۔ایس پی لیڈر نے کہاکہ ہمیں 28سیٹوں میں سے 15پر جیت درج کرنے کی امید ہے ۔غورطلب ہے کہ دہلی میونسپل کارپوریشن 2012میں شمالی، جنوبی اور مشرقی دہلی میونسپل کارپوریشن میں تقسیم ہو گیا تھا،کل 272وارڈوں میں سے این ڈی ایم سی اور ایس ڈی ایم سی میں ہر ایک کے پاس 104سیٹیں ہیں جبکہ ای ڈی ایم سی کے پاس 64سیٹیں ہیں، میونسپل کارپوریشن میں گزشتہ 10سالوں سے بی جے پی اقتدار میں ہے۔