رائے پور/نئی دہلی،22؍ستمبر (ایس او نیوز؍ایجنسی) چھتیس گڑھ میں بہوجن سماج پارٹی (بی ایس پی) نے کانگریس کے ساتھ اتحاد کی کافی طویل عرصے سے جاری قیاس آرائی کو ختم کرتے ہوئے سابق وزیر اعلی اجیت جوگی کی نو تشکیل شدہ جنتا کانگریس سے آج اتحاد کا اعلان کر دیا۔ بی ایس پی سپریمو مایاوتی اور جنتا کانگریس کے صدر اجیت جوگی کے دستخط سے آج یہاں جاری بیان کے مطابق 90 رکنی اسمبلی میں جنتا کانگریس 55 سیٹوں پر اور بہوجن سماج پارٹی (بی ایس پی) 35 سيٹوں پر الیکشن لڑے گي۔ اس اتحاد کے وزیر اعلی کے عہدے کے امیدوار اجیت جوگی ہوں گے۔
دونوں رہنماؤں کے مطابق گزشتہ 15 سالوں میں چھتیس گڑھ کی غیر متوازن ترقی ہوئی ہے۔ بی جے پی کے دور حکومت میں غریب مزید غریب اور امیر مزید امیر بن گئے ہیں۔ قومی سطح پر چھتیس گڑھ کی نظر اندازی دور کرنے کے لئے ایک مضبوط علاقائی نمائندگی اور قیادت کی ضرورت کے پیش نظر یہ اتحاد کرنے کا فیصلہ کیا گیا۔