لگایاسازباز کا الزام،انتخابی فائدے کے لئے فرقہ وارانہ فسادبھی کراسکتی ہے ایس پی،بی جے پی کوسرمایہ دارحامی اور غریب مخالف بتایا 

اعظم گڑھ، 28؍اگست(ایس او نیوز/آئی این ایس انڈیا)اتر پردیش میں اگلے سال ہونے والے اسمبلی انتخابات کی تیاریوں میں مصروف بی ایس پی سربراہ مایاوتی نے خدشہ ظاہر کیا ہے کہ بی جے پی اور مرکز حکومت اپنی ناکامیوں سے توجہ ہٹانے کے لئے کشمیر اور دہشت گردی کے مسئلے پرالجھ سکتی ہے۔ایس پی سربراہ ملائم سنگھ یادو کے پارلیمانی علاقے اعظم گڑھ میں پارٹی کی جانب سے منعقد ’’سروجن ہتائے‘‘ریلی سے خطاب کرتے ہوئے مایاوتی نے سماج وادی پارٹی اور بی جے پی پر ایک ساتھ نشانہ سادھا اور دونوں میں ساز باز کا الزام لگاتے ہوئے کہا کہ انتخابی فائدہ کے لئے وہ ریاست میں فسادات بھی کروا سکتے ہیں۔مرکز میں حکمران بی جے پی کی زیر قیادت این ڈی اے حکومت کو سرمایہ دار پرست اور غریب اور دلت مخالف قرار دیتے ہوئے بی ایس پی سربراہ نے کہا کہ بی جے پی اور مرکز حکومت اپنی کوتاہیوں سے توجہ ہٹانے کے لئے کشمیر اور دہشت گردی کے مسئلے پر جنگ(پاکستان کے ساتھ)میں جا سکتی ہے۔چار بارریاست کی وزیر اعلی رہ چکی مایاوتی نے کہا کہ دونوں(مرکز اور ریاست)حکومتوں نے لوگوں کو دھوکہ دیا ہے، دونوں جماعتیں آپس میں ملی ہوئی ہیں اور اسمبلی انتخابات سے پہلے ہندو مسلم فسادات کروا سکتے ہیں لیکن اب لوگوں کو یہ بات سمجھ میں آنے لگی ہے۔انہوں نے بی جے پی کو دلت مخالف بتایا اور ایس پی پر غنڈوں اور مافیا کو فروغ دینے کا الزام لگایا اور کہا کہ بی ایس پی اقتدار میں واپس آنے کے بعد دوبارہ قانون کا راج قائم کرے گی۔جرائم پیشہ عناصر کے خلاف سخت کارروائی کی جائے گی اور سرکاری زمینوں پر غیر قانونی قبضے ہٹوائے جائیں گے۔
بی ایس پی سربراہ نے سوامی پرساد موریہ، کے آر کے چودھری اور برجیش پاٹھک جیسے لیڈروں کے پارٹی چھوڑ کر جانے کے واقعہ کو معمولی بتانے کی کوشش میں کہا کہ ہمارے مخالف، خاص کر بی جے پی، ہمارے ناپسندیدہ مال کو اپنی پارٹی میں بھر رہے ہیں،کیونکہ ان کے پاس انتخاب لڑنے کے قابل امیدواروں کی کمی ہے۔پارٹی چھوڑنے والے لیڈران کی طرف سے ٹکٹ فروخت کے الزام پر مایاوتی نے کہا کہ ایک طرف کہتے ہیں کہ بی ایس پی ختم ہو رہی ہے، دوسری طرف کہتے ہیں کہ بی ایس پی ٹکٹ فروخت کر رہی ہے،اگر ہماری پارٹی کمزور ہو رہی ہے تو لوگ ٹکٹ خریدنے میں دلچسپی کیوں لے رہے ہیں۔یہ سارے الزامات غلط ہیں اور پارٹی کی تصویر بگاڑنے کی نیت سے لگائے گئے ہیں۔