نئی دہلی ،23؍اپریل (ایس او نیوز؍آئی این ایس انڈیا )دہلی میں ایم سی ڈی انتخابات میں اس بار جس طرح کی ووٹنگ کی امید کی جا رہی تھی ،اس قسم کی ووٹنگ نہیں ہو رہی ہے۔دوپہر تک ووٹنگ کے اعداد و شمار نے بمشکل 10فیصد تک پہنچے تھے ۔جہاں بی جے پی کو زیادہ ووٹنگ کی امید تھی اور یہ امید بھی پارٹی کے حق میں تھی، وہیں، عام آدمی پارٹی بھی ایسی ہی امید لگائے بیٹھی ہے۔کانگریس بھی خود کو اس دوڑ میں سب سے آگے مان رہی ہے، لیکن ووٹنگ فیصد نے ان سب کی امیدوں پر پانی پھیر دیا ہے۔ادھر، دہلی بی جے پی کے صدر منوج تیواری نے میڈیا سے بات کرتے ہوئے کہا کہ ہمیں لگ رہا ہے کہ 225کے اوپر سیٹیں آئیں گی،یعنی اب بھی بی جے پی کو امید ہے کہ وہ 225سیٹوں پر جیت درج کرے گی۔تیواری کا کہنا ہے کہ پارٹی امیدواروں کو مودی جی کے چہرے پر ووٹ مل رہا ہے۔دہلی بی جے پی صدر نے الزام لگایا کہ عام آدمی پارٹی کے کنوینر اور دہلی کے وزیر اعلی اروند کیجریوال نے کچھ نہیں کیا،وہ صرف، بیماریوں پر ڈینگو پر سیاست کر رہے ہیں۔اروند کیجریوال عوام کو دھمکانے والا بیان دیتے ہیں،تیواری نے کہا کہ ہم نے کیجریوال کے خلاف اس پرایف آئی آر بھی درج کرائی ہے۔حال ہی کانگریس کے دو بڑے لیڈروں کو پارٹی میں شامل کرنے کے سوال پر منوج تیواری نے کہا کہ ہمیں جو ٹھیک لگا ہم نے اسے لے لیا۔حال ہی میں کانگریس کی دہلی خاتون شاخ کی سابق صدر برکھا شکلا سنگھ اور دہلی کانگریس کے سابق صدر اروندر سنگھ لولی بی جے پی میں شامل ہو گئے ہیں۔تیواری کا کہنا ہے کہ کانگریس ہو یاآپ، اچھے لوگ آنا چاہیں تو ان کا پارٹی میں استقبال ہے ، لولی بڑا چہرہ ہیں ،تو اس میں کیا برائی ہے، دونوں پارٹیوں کے لوگ ہی اپنی پارٹیوں سے تنگ ہیں۔