منگلورو:فیس بک دوست نے خاتون کو لگایا 16لاکھ روپے کا چونا!
منگلورو25؍جون (ایس او نیوز)منگلورو کے اتّاور کی رہنے والی ریشما کو فیس بک پر ایک اجنبی کے ساتھ دوستی کرنا اس قدر مہنگا پڑا کہ ایک مختصر سے عرصے کی جان پہچان کے بعد اسے دھوکہ دہی کے ذریعے 16لاکھ روپے کا چونا لگادیا گیا۔
موصولہ رپورٹ کے مطابق ریشما کو فیس بک پر جیاک کولمین نامی ایک اجنبی کی طرف سے دوستی کا پیغام ملا۔ریشما نے اسے قبول کیا اور وہ دونوں فیس بک پر مسلسل چیاٹنگ کرنے لگے۔مئی کے مہینے میں کولمین نے ریشما سے کہا کہ وہ ریشما کی فیملی کے لئے 20ہزار پاؤنڈ(تقریباً18لاکھ روپے) کا تحفہ دینا چاہتا ہے۔ ریشما نے اسے منع کیا مگر وہ اپنی بات پر اصرار کرتا رہاکہ ریشما کویہ تحفہ قبول کرنا چاہیے۔
کچھ دنوں بعد ایک دوسرے شخص نے ریشما کو فون کرکے بتایا کہ وہ دہلی کسٹمز کا آفیسر ہے۔ کولمین نے جو تحفہ اسے بھیجا ہے اس میں کئی قوانین کی خلاف ورزیاں ہوئی ہیں، اس لئے ریشما کو جرمانہ بھرنا ہوگا ورنہ اسے جیل جانا پڑے گا۔ ریشما نے ڈر کے مارے ’کسٹم آفیسر‘ کی بات مانتے ہوئے انٹر نیٹ بینکنگ کے ذریعے16,69,000روپے ’جرمانہ ‘ادا کیا۔ اس کے بعد کولمین اور ’کسٹم آفیسر‘ سے کوشش کے باوجود کوئی رابطہ نہیں ہوسکاکیونکہ ان کے نمبر سوئچ آف ہوگئے تھے۔
اس دھوکہ دہی کے تعلق سے سائبر پولیس اسٹیشن میں کیس درج کردیا گیا ہے۔