منگلورو جیل کے اندر بھی جبری وصولی جاری۔ قیدیوں نے بینک منیجر سے اینٹھے 15لاکھ روپے
منگلورو،23؍جنوری (ایس او نیوز) منگلورو سنٹرل جیل میں منشیات کی اسمگلنگ اور مارپیٹ اور خونریزی کے معاملات کے ساتھ اب جبری ہفتہ وصولی کا معاملہ سامنے آیا ہے۔
موصولہ رپورٹ کے مطابق انڈین اوور سیز بینک منیجر سیرین مدھو سدن سرکاری محکمے KRIDLکے کھاتے میں جمع کیے گئے 55کروڑ روپے خرد برد کرنے کے الزام میں عدالتی حراست میں ہے۔ اسے جس سیل میں رکھا گیا ہے وہاں پر کوڈیکیرے گینگ کے غنڈے تلک اور دیگر جرائم پیشہ افراد بھی قید ہیں۔ جب انہیں پتہ چلا کہ بینک منیجر نے ایک بڑی رقم خرد برد کی ہے تو انہوں نے اس میں سے اپنا حصہ طلب کیا۔ جب سیرین نے رقم دینے سے انکار کیا توتلک کے علاوہ متھن، نکھل، شیوو،راجو اور چرن نامی مجرموں نے اس کے ساتھ مارپیٹ اور ذہنی اذیتوں کا سلسلہ شروع کیا ۔ جس سے تنگ آکر انہی قیدیوں کی طرف سے فراہم کیے گئے موبائل فون سے سیرین نے اپنے والدین سے جیل کے قیدیوں کی مانگ پوراکرنے اور رقم فراہم کرنے کی درخواست کی۔
سیرین کے والدین نے برکے پولیس میں جبری ہفتہ وصولی کی جو شکایت درج کی ہے اس کے مطابق انہوں نے تین قسطوں میں 15لاکھ روپے ان قیدیوں کو ادا کیے ہیں۔