منگلوروپولیس کمشنریٹ کے تحت 2اینٹی راوڈی اسکواڈ کی تشکیل
منگلورو9؍اکتوبر (ایس او نیوز) گزشتہ کچھ دنوں سے منگلورو اور اطراف میں جرائم پیشہ افراد کی سرگرمیاں تیز ہوجانے کے پس منظر میں منگلورو پولیس کمشنریٹ کے تحت 2اینٹی راوڈی اسکواڈز تشکیل دئے گئے ہیں، تاکہ گروہی قتل و غارت گری پر قابو پایا جاسکے۔
موصولہ تفصیل کے مطابق ایک اسکواڈ ناردھن سب ڈیویژن کے لئے ہوگا جبکہ دوسرا اسکواڈ سدرن سب ڈیویژن میں کام کرے گا۔سدرن ڈیویژن اسکواڈ کی ٹیم میں 8افسران ہونگے جن کی قیادت اے سی پی راماراؤ کے ذمے ہوگی۔ یہ اسکواڈالال ، کوناجے ، کنکن ناڈی اور کچھ دوسرے علاقے میں کام کرے گا جبکہ پانمبور، مولکی،سورتکل، بجپے، موڈبیدری، منگلورو مضافات اور کاوور کے لئے جلد ہی تشکیل دیا جائے گا۔جبکہ سنٹرل سب ڈیویژن کے لئے کسی اسکواڈ کی تشکیل کا ابھی کوئی منصوبہ نہیں بنا ہے۔
پولیس کے اعلیٰ افسران کے مطابق گزشتہ ایک ہفتے کے اندر گروہی رقابت کی وجہ سے غنڈوں کی طرف سے انجام دئے گئی قتل کی تین وارداتوں کو سنجیدگی سے لیتے ہوئے اینٹی راوڈی اسکواڈ کو پھر سے عمل میں لانے کا فیصلہ کیا ہے۔ خیال رہے کہ ماضی میں انسپکٹر جینت شیٹی کی قیادت میں اینٹی راوڈی اسکواڈ نے موثر کارروائیاں کرتے ہوئے ممبئی کے انڈر ورلڈ سے وابستہ گرگوں اور غنڈوں کی مجرمانہ سرگرمیوں پر قابو پایا تھا۔ اس زمانے میں کچھ جرائم پیشہ افراد کو غنڈ ہ ایکٹ کے تحت بھی سلاخوں کے پیچ دیا گیا تھا۔ پھر جب غنڈوں کے مجرمانہ کارروائیاں کچھ تھم گئیں تو اینٹی راوڈی اسکواڈ بھی غیر فعال ہوگیا تھا۔
اب دوبارہ جرائم کا گراف بڑھتے دیکھ کر نئے اسکوادز تشکیل دیے گئے ہیں۔ سٹی پولیس کمشنر ٹی آر سریش نے بتایا کہ شہر کے جرائم پیشہ افراد کی فہرست تیار کرکے ان سب کو پولیس اسٹیشن بلاکر تنبیہ یا مناسب قانونی کارروائی کی جائے گی۔جبکہ جنوبی کینر اکے ایس پی سدھیر کمار ریڈی نے بتایا کہ ضلع میں تقریباً ایک ہزار کے قریب راوڈی شیٹرز ہیں۔ ان سب کو بار بار پولیس اسٹیشن بلایا جائے گا اور ان کی سرگرمیوں پر نگاہ رکھی جائے گی۔