منگلورو: پولیس کانسٹیبل سے نقدی اور موبائل فون لوٹنے کے الزام میں 3 گرفتار
منگلورو20؍اگست (ایس او نیوز) نہرو میدان کے قریب آرمڈریزرو فورس کے ایک کانسٹیبل سے نقدی اور موبائل فون لوٹنے کے الزام میں پاندیشور پولیس اور اینٹی راؤڈی اسکواڈ کے افسران نے تین افراد کو گرفتار کرلیا ہے۔
موصولہ رپورٹ کے مطابق گرفتار شدہ افراد کے نام چکمگلورو کے رہنے والے یاتھیش ایم ایس عرف یاتی(۲۲سال)،محمد اشرف عرف اجّو (۲۳سال)اور بنٹوال کے رہنے والے اشرف عرف محمد اشرف عرف نظام (۲۱سال) بتائے گئے ہیں۔کہاجاتا ہے کہ آرمڈ فورس کا کانسٹیبل سرینواس تین مہینے پہلے جب نہرو میدان کی ایک گلی سے رات کے وقت گزر رہاتھا تو اس وقت تین اجنبیوں نے اس کا راستہ روکا تھا اور اس کے پاس سے 450روپے نقد اور موبائل فون چھین لیاتھا۔یہ معاملہ پانڈیشور پولیس اسٹیشن میں درج کرلیا گیا تھا۔
کہاجاتا ہے کہ یاتھیش ایم ایس اس کیس میں کلیدی ملزم ہے اور وہ ایک بدنام زمانہ چور ہے۔پولیس تحقیقات کے دوران یہ بات سامنے آئی ہے کہ بنگلورو اور اس کے اطراف میں یاتھیش اوراس کا ساتھی روی عرف شنکرلنگے گوڈا خواتین کے گلے سے سونے کی چین اڑانے اور موٹر بائکس چوری کرنے کے معاملات میں ملوث رہے ہیں۔
گرفتار ملزمین کے بارے میں پتہ چلا ہے کہ وہ نہرو میدان کے علاقے میں مٹر گشتی کیا کرتے تھے اور تنہا لوگوں کو لوٹا کرتے تھے۔پولیس کے بیان کے مطابق اس نے ان ملزمین کے پاس سے لوٹے گئے موبائل فونس برآمد کرلیے ہیں۔