منگلورو:شراب کی لت سے مجبور شخص نے کی پھانسی لگاکر خود کشی
منگلورو 16؍اکتوبر(ایس او نیوز)کڈبا تعلقہ کے ناگری میں ونئے خوشالپّا (35سال) نامی ایک شخص نے اپنی شراب کی لت سے مجبور ہوکر جنگلی علاقے میں پھانسی لگاکر خودکشی کرلی۔ معلوم ہوا ہے کہ پھانسی لگانے سے کچھ دیر قبل اس نے اپنے دوستوں کو وہاٹس ایپ کے ذریعے مسیج بھیجا اور خود کشی کرنے کے ارادے اور مقام سے آگاہ کیاتھا۔
ونئے کے بارے میں بتایا جاتا ہے کہ وہ پہلے آٹو رکشہ ڈرائیور کے طور پر کام کرتاتھا پھر قلی مزدوری کرنے لگا ۔ اس دوران وہ عادی شرابی بن گیا ۔ اس نے اس لت سے چھٹکارہ پانے کے لئے علاج بھی کیااور نشے کی عادت چھڑانے والے کیمپوں میں بھی شرکت کی تھی مگر وہ شراب کی لت سے چھٹکارا پا نہیں سکا تھا۔ ونئے ابھی تک غیر شادی شدہ تھا۔ جس دن اس نے خود کشی کی اس دن صبح میں وہ اپنے دوستوں سے ملا تھا اور خو ش اور مطمئن دکھائی دے رہا تھا۔ پھر اچانک دوپہر 2بجے کے قریب اس نے اپنے دوستوں کو فون کرکے خودکشی کے بارے میں بتایا تھا۔ دوستوں نے واپس اسے فون کیاتو اس نے دو ایک بار فون ریسیو بھی کیا ،لیکن کوئی بات نہیں کی اور بس روتا رہا۔پھر جب لوگ اس کی تلاش میں نکلے تو پاس کے جنگلاتی علاقے میں کاجو کے درخت سے اس کی لاش لٹکی ہوئی پائی گئی۔ مہلوک کے چچا کی طرف سے داخل شکایت کی بنیاد پر پولیس نے ایک غیر فطری موت کا معاملہ درج کرلیا ہے۔