شرتھ مڈیوال جنازہ جلوس کے دوران پتھراؤ اور کشیدگی کے ملزمین ہندوتوا لیڈروں کوملی عدالت سے ضمانت
منگلورو27؍جولائی (ایس او نیوز) شرتھ مڈیوال نامی آر ایس ایس کارکن کے جنازہ جلوس کے دوران بی سی روڈ پر پتھراؤ کرنے اور کشیدگی پھیلانے کے لئے پولیس نے جن17 ملزمین کو گرفتار کیا تھاانہیں عدالت سے ضمانت مل گئی ہے۔ اس کے ساتھ ہی پولیس کی جانب سے مقدمات دائرکیے جانے کے بعدسنگھ پریوار کے جوسخت گیر لیڈران گرفتاری سے بچنے کے لئے فرار ہوگئے تھے ان سب کوبھی منگلورو سیشنس کورٹ سے پیشگی ضمانت مل گئی ہے۔
موصولہ رپورٹ کے مطابق جن 5 ہندوتواوادی سخت گیر لیڈروں کو عدالت سے پیشگی ضمانت ملی ہے ان میں بی جے پی بیک ورڈ کلاس مورچہ کے ریاستی سکریٹری ستیہ جیت سورتکل، بجرنگ دل ریاستی کنوینر شرن پمپ ویل، بجرنگ دل لیڈر پردیپ پمپ ویل، بی جے پی یووا مورچہ کے جنوبی کینرا ڈسٹرکٹ صدر ہریش پونجا اور جنوبی کینرا زون کے گؤ رکھشا پرمکھ مرلی کرشنا ہاس تڈکاکے نام شامل ہیں۔
فورتھ ایڈیشنل ڈسٹرکٹ اینڈسیشنس جج نیرالے ویربھدریا بھوانی نے ریگولر اور اینٹی سپیٹری ضمانت کی عرضیوں پر سماعت کے بعد تما م ملزمین کی ضمانت منظور کرتے ہوئے اپنے آرڈر میں لکھا ہے کہ 5مفرور ملزمین آئندہ سات دنوں کے اندر تحقیقاتی افسر کے سامنے پیش ہوں اور ان کو50ہزار روپے کے شخصی بانڈ اور دو ضامن suretyکے بدلے رہاکیا جائے۔ اور ان دو ضمانت دینے والوں میں سے ایک ملزم کے والدین، ان کے بچے یا بیوی ہونا چاہیے۔اس کے علاوہ ان ملزمین پر پولیس اسٹیشن اور عدالت میں حاضری کے سوا کسی اور مقصد سے مقامی میجسٹریٹ کی اجازت کے بغیر بنٹوال میں داخل ہونے پر پابندی عائد کی گئی ہے۔