منگلورو24؍مئی (ایس او نیوز)ایس ایس ایل سی اور پی یو سی وغیرہ کے پبلک امتحانات میں پرچہ جانچنے یا پھر مارکس اینٹری کرنے میں گڑ بڑ کے معاملات ہر سال سامنے آتے رہتے ہیں۔امسال بھی منگلورو سے ملنے والی ایک خبر کے مطابق سینٹ ایلوشیئس ہائی اسکول کوڈیال بیل کے ایک طالب علم ایلسٹائر کیوین بنگیرا کے ساتھ بھی ایسا ہی کچھ معاملہ ہوا۔

جب ایس ایس ایل سی کے نتائج ظاہر ہوئے تو کیوین کو حیرت کا جھٹکا لگا کہ اسے انگریزی مضمون میں صرف 59مارکس ملے ہیں، جبکہ اس کا پرچہ بہت ہی اچھا ہوا تھا۔ اس نے اپنے اساتذہ سے مشورہ کرنے کے بعد جوابی پرچے کی زیراکس کاپی منگوائی تو اس کے لئے اب خوشی سے اچھل پڑنے کی باری تھی، کیونکہ اس کے پرچے کے حساب سے اسے59نہیں بلکہ97مارکس ملے ہیں۔

امتحانی پرچوں کی جانچ کرنے یا پھر مارکس کا اندراج کرنے والوں کی ذراسی بے احتیاطی طالب علموں کی اگلی تعلیمی زندگی کا پانسہ پلٹ کر رکھ دیتی ہے۔ کتنے ہی ایسے طالب علم ہونگے جو اپنے حاصل کردہ مارکس پر شک ہونے کے باوجود اس کی دوبارہ جانچ کی طرف توجہ نہیں دیتے ہونگے اور اگر وہ اس کا طرح اقدام کریں تو شاید ان کے مارکس میں اضافہ ہواور ان کے رینک پر بھی اس کا اثر ظاہر ہوجائے۔