شیرور گرین ویلی اسکول کے چیرمین عبدالقادر باشو انتقال کرگئے؛ شام کو مینگلور میں ہوگی تدفین
بھٹکل 25/جولائی (ایس او نیوز) مشہور و معروف تعلیمی ادارہ گرین ویلی نیشنل اسکول شیرور کے بانی اور چیرمین جناب عبدالقادر باشو آج صبح کی اولین ساعتوں میں مینگلور کے ایک ہوٹل میںانتقال کرگئے۔ انا للہ و اناالیہ راجعون ۔ ان کی عمر 54 سال تھی۔
دبئی کے معروف بزنس مین اور کئی اداروں سے منسلک سماجی خدمت گار جناب باشو بھائی اپنی بیٹی کی شادی کے لئے مینگلور آئے تھے، 15 جولائی کو اُن کی بیٹی کی شادی کی تقریب ہوئی تھی اور اُس وقت سے وہ مینگلور کے ایک ہوٹل میں ہی رہائش پذیر تھے۔ اُن کے قریبی ذرائع نے بتایا کہ رات کو وہ بالکل ٹھیک ٹھاک تھے اور آرام کرنے گئے تھے ، مگر صبح دیکھا تو اُن کی روح قبض ہوچکی تھی۔ ذرائع نے بتایا کہ دل کا دورہ پڑنے سے اُن کا انتقال ہوا۔
میت مینگلور کے کُدرولی میں واقع اُن کے سسرال لے جائی گئی، شام قریب سات بجے کدرولی جامع مسجد میں اُن کی نماز جنازہ ادا کی جائے گی اور کدرولی قبرستان میں ہی اُن کی ہی تدفین عمل میں آئے گی۔
ان کے انتقال پر مختلف اداروں کے ذمہ داران نے گھر والوں سے تعزیت کی ہے اور اچانک ہوئی ان کی موت پر گہرے دکھ کا اظہار کیا ہے۔ بھٹکل کے مسلم کمیونٹی لیڈر، دبئی کے معروف این آر آئی اور ساحل آن لائن میڈیا اینڈ پبلیشنگ سوسائٹی کے چیرمین جناب ایس ایم سید خلیل الرحمن نے ان کی موت پر گہرے رنج وغم کا اظہار کرتے ہوئے ان کی موت کو قوم وملت کے لئے بڑا خسارہ قرار دیا ہے اور اللہ تعالیٰ سے دُعا کی ہے کہ اللہ ان کی بھرپورمغفرت فرمائے ، جنت الفردوس میں اعلیٰ مقام عطا فرمائے اور قوم کو ان کا نعم البدل عطا فرمائے۔
ان کے انتقال پر بھٹکل کا سب سے بڑا اور معروف تعلیمی ادارہ انجمن حامئی مسلمین بھٹکل سمیت قومی و ملی سماجی ادارہ مجلس اصلاح و تنظیم بھٹکل کی جانب سے بھی نہایت افسوس کا اظہار کیا گیا ہے اور گھروالوں سے تعزیت کرتے ہوئے دُعا کی گئی ہے کہ اللہ تعالیٰ موصوف کی خدمات کو قبول فرمائے اور ان کی بال بال مغفرت فرمائے، ساتھ ساتھ تمام پسماندگان کو صبر جمیل عطا فرمائے۔ اٰمین
