منگلورو،19اکتوبر(ایس او نیوز) منگلورو کی سڑکوں پر پڑے ہوئے گڈھے اور اس میں بارش کا پانی جمع ہوجانے سے عوام کو جن تکالیف کا سامنا کرنا پڑتا ہے اس کی طرف میونسپل کارپوریشن کی توجہ مبذول کروانے کے لئے MCC Civic Groupنامی ایک عوامی ادارے اور عام آدمی پارٹی (AAP)کے رضاکاروں نے ایک انوکھے طریقے سے اپنا احتجاج درج کروایا۔

احتجاج میں شامل کچھ لوگوں نے کنکن ناڈی مارکیٹ علاقے میں مچھیروں کے جیسا لباس پہن کرسڑک کے گڈھوں میں جمع بارش کے پانی میں علامتی طور پر مچھلیوں کا شکار کیا ۔ اس کے علاوہ کچھ بڑے اور بچوں نے مل کر اس پانی میں کاغذ کی کشتیاں چھوڑنے کا مظاہرہ کیا ۔احتجاجیوں کا کہنا تھا کہ سڑکوں کی بدحالی عوام کے لئے جان کا وبال بن گئی ہے اور میونسپل کارپوریشن سڑکوں کو درست کرنے اور اسے بہتر حالت میں بحال رکھنے میں پوری طرح ناکام ہوگئی ہے۔کنکن ناڈی کے علاوہ پڈیل، بینڈور ویل،جیوتی سرکل جیسے مقامات پر سڑکوں کی حالت انتہائی خراب ہے۔ اور ایسی سڑکوں پر نشے کی حالت میں یا پھر بے پروائی سے ڈرائیونگ کرنے کی وجہ سے حادثات میں مزید اضافہ ہورہا ہے جو انسانی جان و مال کے نقصان کا بڑاسبب بن گیا ہے۔

مظاہرین نے کہا کہ اس سے پہلے بھی کارپوریشن اور متعلقہ محکمہ جات کے افسران کو سڑکوں کی بدحالی سے مطلع کرتے ہوئے مرمت کی جانب توجہ دلائی گئی تھی، لیکن حکام کے کانوں پر جوں نہیں رینگتی اور دن بدن سڑکوں کی حالت خستہ ہوتی جارہی ہے۔دیکھنا یہ ہے کہ اب اس انوکھے احتجاج کا کیا نتیجہ نکلتا ہے۔