منگلورو:سوشیل میڈیا پرجناردھن پجاری کے انکاؤ نٹر کی مانگ کرنے والا ملزم پولیس کی گرفت میں
منگلورو8؍ستمبر (ایس اونیوز) ایودھیا میں رام مندر تعمیر کرنے کی حمایت پر کانگریسی لیڈر جناردھن پجاری کے خلاف سوشیل میڈیا پر اشتعال انگیز آڈیو کلپ وائرل کرنے والے ملزم کو پولیس نے گرفتار کرلیا ہے۔
خیال رہے کہ کچھ دن قبل سینئر کانگریسی لیڈر جناردھن پجاری نے کھل کر رام مندر تعمیرکرنے کی حمایت کی تھی۔ اس کے جواب میں مبینہ طور پر کانگریس مائناریٹی سیل کے ایک لیڈر کا آڈیو کلپ وائرل ہوگیاتھا جس میں مطالبہ کیا گیا تھا کہ جناردھن پجاری سمیت تمام ایسے لوگوں کو ملک بدر کیا جائے یا پھر ان کاانکاؤ نٹرکردیا جائے جو رام مندر کی حمایت کرتے ہیں۔ اس کے علاوہ یہ بھی مانگ کی گئی تھی کہ جب تک آر ایس ایس کی حامی جناردھن پجاری کو کانگریس سے نکال باہر نہیں کیا جاتا تب تک مسلمانوں کو کانگریس کو ووٹ دینے سے باز آنا چاہیے۔
اس سلسلے میں سابق رکن اسمبلی جے آر لوبو نے پولیس کے پاس شکایت درج کروائی تھی جس پر کارروائی کرتے ہوئے کوور پولیس نے حکیم پتّورنامی شخص کو بدامنی پھیلانے کی کوشش اورمجرمانہ دھمکی دینے کے الزام میں گرفتار کرلیا ہے۔ پولیس کے بیان کے مطابق ملزم نے تفتیش کے دوران کہا ہے کہ مجرمانہ کارروائی انجام دینے کا اس کاکوئی اراد ہ نہیں تھا بلکہ وہ رام مندر کی تعمیرکی حمایت کرنے والے جناردھن پجاری کے بیان سے ناراض ہوگیا تھا۔اپنے بیان پر حکیم نے معذرت کرلی ہے۔ لیکن وہ اب بھی اس بات پر قائم ہے کہ جناردھن پجاری جیسے کانگریسی لیڈر کوایودھیا میں رام مندر کی حمایت نہیں کرنی چاہیے۔