زبیر مرڈر کیس : پانچ ملزمین گرفتار۔ یہ سیاسی قتل نہیں بلکہ ذاتی رقابت کا نتیجہ ۔ پولیس
منگلورو 11؍اکتوبر (ایس او نیوز)الال کے قریب موکاچیری میں زبیر نامی شخص کا جو بے رحمانہ قتل ہواتھا اس سلسلے میں پانچ ملزمین کو گرفتار کرلیا ہے۔ پولیس کمشنر ٹی آر سریش کے مطابق گرفتار شدہ ملزمین کے نام سہیل عرف رحمان سہیل(۲۳سال)،نظام الدین عرف نظام(۲۳سال)، محمد مصطفی (۲۱سال)،تاج الدین(۲۴سال) اور آصف (۴۰سال) ہیں۔
پولیس کمشنر نے واضح کیا ہے کہ اس قتل کے پیچھے کوئی سیاسی رقابت یا اسباب موجود نہیں ہیں بلکہ تمام ملزمین مجرمانہ سرگرمیوں اور قتل جیسے جرائم میں پہلے سے ملوث رہے ہیں۔ان ملزمین میں سے منڈا آصف نامی راوڈی شیٹرپولیس کو دس معاملات میں مطلوب تھا اور زبیر قتل کی سازش اسی نے رچی تھی۔
قتل کے اصل سبب کے بارے میں پولیس کا کہنا ہے کہ سال 2016میں فساد کے سلسلے میں زبیر نے الطاف نامی شخص کے خلاف کیس داخل کیا تھا۔ جس کے بعد الطاف کو غنڈہ ایکٹ کے تحت گرفتار کرلیا گیا تھا۔ الطاف 6ماہ قبل رہا ہوگیا ہے ۔ اس کے بعد بدلے کی کارروائی میں زبیر کو موت کے گھاٹ اتاراگیا ہے۔ اس کے علاوہ پولیس نے یہ بھی کہا کہ پچھلے ایک سال سے زبیر نے موکاچیری مسجد کے قریب رہائش اختیار کرلی تھی اور مسجد کمیٹی کے ساتھ بھی اس کے کچھ اختلافات پیدا ہوگئے تھے۔