کار کے شیشوں پرکالی فلم چپکانے والوں کے خلاف منگلورو پولیس کی کارروائی
منگلورو14؍نومبر(ایس او نیوز) کچھ دن پہلے سٹی پولیس کمشنر نے ٹریفک پولیس کو ہدایت جاری کی تھی کہ شہر میں کالی فلم چپکاکر کار کے شیشوں کو دھندلاکرنے والوں کے خلاف کارروائی کی جائے۔
پولیس کمشنر کی ہدایت پر عمل کرتے ہوئے ٹریفک اسسٹنٹ پولیس کمشنرمنجو ناتھ شیٹی کی رہنمائی میں ٹریفک پولیس انسپکٹر امان اللہ اور شیوپرکاش کے علاوہ دیگر عملے نے خصوصی کارروائی کی اور 20کاروں کے شیشوں پر سے موقع پر ہی کالی فلمس اتاردی گئی۔خیال رہے کہ سپریم کورٹ نے موٹر گاڑیوں کے شیشوں کو دھندلا کرنے کے خلاف فیصلہ سنایاہے۔ اس سے قبل کار کے شیشوں کو دھندلا کرنے والوں کے خلاف 100روپے جرمانہ عائد کیا جاتاتھا۔لیکن شہر میں اس پر روک لگنے کے بجائے شوقین مزاج کاروالوں کی تعداد میں روزبروز اضافہ ہوتا جارہاتھا۔ اس صورتحال کو دیکھتے ہوئے سٹی پولیس کمشنر نے ٹریفک پولیس کو کارروائی کرتے ہوئے شیشوں پر سے کالی فلم خود ہی اتارنے کی ہدایت جاری کی تھی۔
سٹی پولیس کمشنر ٹی آر سریش،ڈپٹی کمشنر آف پولیس ہنومنتھا رایا اور اوما پرشانت نے اس مہم کی نگرانی کی۔