بنٹوال، 18؍جنوری (ایس او نیوز) کنڑا روزنامہ وجئے کرناٹکا سے وابستہ فوٹو جرنلسٹ سدھاکر یرمال پر بنٹوال پولیس اسٹیشن میں اسلام کے خلاف وہاٹس ایپ پر بدگوئی کرنے اور مذہبی جذبات کو ٹھیس پہنچانے کے لئے کیس درج کیا گیا ہے۔

موصولہ رپورٹ کے مطابق ضلع انچارج وزیر رماناتھ رائے سے رابطہ اورتبادلۂ خیال کے لئے بنائے گئے وہاٹس ایپ گروپ 'Media and Rai Sir'پر دھاکر یرمال نے اسلام کے خلاف گھٹیا زبان استعمال کرتے ہوئے مخالفانہ پروپگنڈہ کرنے والا مواد پوسٹ کیا تھا۔ بنٹوال کے میونسپل کاونسلر منیش علی نے اس کے خلاف بنٹوال پولیس اسٹیشن میں شکایت درج کروائی اور کہا کہ اس قسم کامواد پوسٹ کرنے سے فرقہ وارانہ بدامنی پھیلنے کا اندیشہ ہے۔ پولیس نے تحقیقات کی تو موبائل نمبر کے ذریعے معلوم ہوا کہ یہ پوسٹ فوٹو جرنلسٹ سدھاکر کی ہے۔ اس کے بعد کیس درج کرتے ہوئے پولیس سدھاکر کو گرفتار کرنے کے لئے پڈیل میں واقع اس کی رہائش گاہ پر پہنچی مگر وہ پولیس کے ہاتھ نہیں لگا۔

کہاجاتا ہے کہ سدھاکر کے خلاف کیس درج نہ کرنے کے لئے پولیس پر کافی دباؤ بنایا گیا تھا مگر ایس پی سدھیر کمار ریڈی نے بتایا کہ قانون سب کے لئے یکساں ہوتا ہے اس لئے سدھاکر کو خصوصی رعایت دینے کا سوال پیدا نہیں ہوتا۔ پولیس اس معاملے کی مزید تحقیقات کررہی ہے۔ خیال رہے کہ چند مہینے پہلے ایک اور اخباری نمائندے کے خلاف بھی اسی طرح مذہبی جذبات کو ٹھیس پہنچانے کے خلاف کیس درج کیا جاچکا ہے۔