منگلورو20؍مارچ (ایس او نیوز) گورپور علاقے میں ایک تیز رفتار پرائیویٹ ایکسپریس بس کی ٹکر سے ایک پولیس کانسٹیبل ہلاک ہوگیا ہے جس کی شناخت دیوی نگر کے رہنے والے مہیش لمانی کے طور پر کی گئی ہے۔مہیش فی الحال شہر کے آئی جی دفتر میں فرائض انجام دے رہاتھا۔

عینی شاہدین کے مطابق کارکلا سے منگلورو جانے والی پرائیویٹ بس ایک دوسری ایکسپریس بس سے ٹکرا گئی جو کہ منگلورو سے شیموگہ کی طرف جارہی تھی۔ مگر تیزرفتاری کی وجہ سے کارکلامنگلورو بس رُک نہیں سکی اور آگے بڑھ کر اس موٹر بائک کو ٹکر ماردی جس پر مہیش لمانی سوارتھا۔ ٹکر لگتے ہی مہیش اچھل کر سڑک کنارے گرگیا اور تیزرفتار پر اس کے سر اور جسم کے ایک حصے پر سے گزرگئی۔اس وجہ سے موقع پر ہی مہیش نے دم توڑ دیا۔بس کی تیز رفتاری کا اندازہ اس بات سے لگایا جاسکتا ہے کہ مہیش نے اپنے سر پر جو ہیلمٹ پہن رکھی تھی وہ بس کا ٹائر گزرنے کی وجہ سے چور چور ہوگئی۔

حادثہ پیش آتے ہی بس ڈرائیور نے بس سے نکل کرراہ فراراختیار کی مگربعد میں پولیس نے اسے گرفتارکر کرلیا۔بس میں موجود مسافروں کا بیان ہے کہ کارکلا سے نکلتے ہی بس ڈرائیور نے بے حد تیز رفتاری سے ڈرائیونگ کرنا شروع کیا تھا۔ ایک موقع پرٹرک کے ساتھ بس کی ٹکرہوتے ہوتے رہ گئی تھی اور تمام مسافر خوف ودہشت سے چیخ پڑے تھے۔ لیکن اس کے باوجود اس ڈرائیور نے اپنی رفتار قابو میں نہیں کی اور بالآخر مہیش لمانی کی ہلاکت پر بس کی رفتار تھم گئی۔

جائے حادثہ پر جمع ہجوم کا کہنا تھا کہ گورپور کے اس علاقے میںآئے دن جان لیوا حادثات ہوتے رہتے ہیں۔ ایک تو یہ بہت ہی تنگ راستہ ہے جہاں پرائیویٹ بس والے بڑی بے پروائی اور تیزرفتاری کا مظاہرہ کرتے ہیں اور حادثات کا سبب بنتے ہیں۔ دوسری طرف حادثات کم کرنے کے لئے اس مقام پر جو روڈ ہمپس بنائے گئے ہیں اس پر رنگین پٹیاں نہیں بنائی گئی ہیں جس سے عام طور پر موٹر سواروں کو دھوکا ہوجاتا ہے اور اکثر وبیشتر یہی ہمپس حادثے کا سبب بن جاتے ہیں۔