شہد کی مکھیوں کے کاٹنے سے ایک ہلاک تین زخمی
منگلورو9/دسمبر (ایس او نیوز)سومیشور کے علاقے میں شہد کی مکھیوں کے کاٹنے سے ایک خاتون کے ہلاک ہونے اور مزید تین افراد کے زخمی ہونے کی اطلاع ملی ہے۔
موصولہ رپورٹ کے مطابق کملا(68سال) نامی خاتون اپنے داماد سری دھر (49سال) کے گھر رہنے کے لئے دو دن قبل لکشمی گُڈّے نامی مقام پر آئی ہوئی تھی۔سری دھر کی ماں جانکی(70 سال) جب پاس کے جنگل میں جلانے کے لئے لکڑیاں جمع کرنے گئی تو اس کے ساتھ کملا بھی تھی۔ اچانک کہیں سے شہد کی مکھیوں کے جھنڈ نے کملا پر حملہ کردیا۔ جب وہ چلانے لگی تو جانکی اس کی مدد کو پہنچی،مگر مکھیوں نے جانکی کو بھی گھیر لیا۔ ان دونوں چیخ و پکار سن کرسری دھر اورلیلاوتی ان کی مدد کو پہنچے۔ اس وقت مکھیوں نے ان پر بھی زوردار حملہ کردیا۔پھر بھی سری دھر ان لوگوں کو کسی طرح بچا کر دور لے آنے میں کامیاب ہوا۔ اس کے بعد تمام زخمیوں کو اسپتال میں داخل کیاگیا۔ مگر کملا پر علاج کارگر نہیں ہوا اور وہ دم توڑ گئی۔ سری دھر علاج کے بعد ٹھیک ہورہا ہے۔جانکی کا ابھی علاج چل رہا ہے جبکہ لیلاوتی کو آئی سی یو میں رکھا گیا ہے۔