منگلورو:تنخواہیں نہ ملنے سے پریشان کچرا ٹھانے والوں نے کی ہنگامی ہڑتال
منگلورو 22؍نومبر (ایس او نیوز)منگلوروسٹی کارپوریشن کی طرف سے شہری حدود میں کچرانکاسی کا ٹھیکہ جس کمپنی کو دیا گیا ہے اس کے ملازمین کی تنخواہیں ادا نہ کیے جانے پر شہر سے کچرا اٹھا لے جانے والوں نے ہنگامی ہڑتال کردی۔جس سے شہر میں کچرا نکاسی کاعمل مکمل طور پر تھم گیا اور جگہ جگہ کچرے کے ڈھیر لگنا شروع ہوگیا۔
موصولہ رپورٹ کے مطابق منگلورو کارپوریشن کی جانب سے کچرا نکاسی کا ٹھیکہ ممبئی میں قائم Antony Waste Handling Cell (Pvt) Ltdکو دیا گیا ہے۔جس کے تحت شہر کے اندر گھر گھر سے کچرا جمع کرکے وامنجور میں قائم کچرا ٹھکانے لگانے کے مرکز تک پہنچانا ہوتا ہے۔کہاجاتا ہے کہ اوسطاً 300تا320ٹن کچراروزانہ جمع کیا جاتا ہے جس کے لئے150گاڑیاں اور 680افراد سرگرم رہتے ہیں۔
دراصل منگلورو سٹی کارپوریشن ستمبر اور اکتوبرکے لئے کمپنی کو پوری رقم ادا کرنے میں ناکام رہی ہے۔ اس کے علاوہ پٹرول اور ڈیزل کی قیمتوں میں اضافے کی وجہ سے کمپنی کو جواضافی رقم دینا طے پایا تھا،پورے ایک سا ل کی مدت گزرنے کے باجود کارپوریشن نے وہ رقم بھی ادا نہیں کی ہے۔جس کی وجہ سے کمپنی نے ملازمین کو تنخواہیں ادا نہیں کیں اور ملازمین نے ہڑتال کی راہ اپنائی۔
پتہ چلا ہے کہ میئر کویتا سانیل کے علاوہ کارپوریشن کمشنر اور دیگر افسران نے کمپنی کے نمائندوں سے بات چیت کرتے ہوئے جلد ازجلد رقم ادا کرنے کا وعدہ کیا ہے ، جس کے بدلے میں ملازمین کی ہڑتال بھی واپس لیے جانے کی بات طے ہوئی ہے۔