منگلورو 9؍اپریل (ایس او نیوز) ایک نجی اسپتال کے قریب ماروتی اومنی میں موبائل کینٹین چلانے والی خاتون پر شرپسندوں کے حملہ کرنے اور اس کی گاڑی کونقصان پہنچانے کی خبر موصول ہوئی ہے ۔

بتایاجاتا ہے کہ کملا کشی نامی خاتون علی الصبح اپنی موبائل کینٹین لے کر مقررہ مقام پر پہنچی اور کھانے پینے کا سامان سیٹ کرنے لگی تو چند لوگ وہاں پہنچے اور اسے اس مقام پر کینٹین لگانے سے منع کردیا۔اس دوران گرما گرم بحث چھڑی تو مبینہ طور پر ان شرپسندوں نے کملاکشی پر حملہ کردیا۔ کسی طرح کملاکشی جان بچاکر وہاں سے بھاگ کھڑی ہوئی تو حملہ آوروں نے اس کا سارا سامان اورکھانے پینے کی چیزیں ادھر ادھر اٹھاکر پھینک دیں۔ اس کے علاوہ گاڑی کے شیشے توڑ پھوڑ کر رکھ دئے۔

کملاکشی نے کدری پولیس اسٹیشن میں جو شکایت درج کروائی ہے اس میں اس نے ہوٹل ارورہ کے مالک رکشتھ شیٹی پر الزام لگایا ہے کہ اسی نے یہ حملہ کروایا ہے ، کیونکہ کملاکشی جس مقام پر کینٹین لگایا کرتی تھی، وہ اس ہوٹل سے بالکل قریب تھا۔ پولیس نے بشمول رکشتھ شیٹی پانچ افراد پر مارپیٹ اور توڑ پھوڑ کے الزامات کے تحت کیس درج کرلیا ہے۔