منگلورو9؍اکتوبر (ایس او نیوز) منگلورو میونسپل کارپوریشن کی میئر کویت سانیل نے اپنے عملے کے ساتھ ایک رہائشی عمارت پر چھاپہ مارا اور غیر قانونی طور پر استعمال کیے جارہے پانی کے کنکشن کو کٹوادیا۔

کہتے ہیں کہ میری ہِل کے علاقے میں 'Vailankanni Abode'نامی عمارت سے گندہ پانی کھلے راستے پر چھوڑنے کی شکایت اطراف میں رہائش پزیر افراد نے کارپوریشن میں درج کروائی تھی۔ جب میئر اس عمارت کے پاس معائنے کے لئے پہنچیں تو پتہ چلا کہ وشال انٹر پرائزز اینڈ ڈیولپرز کی تعمیر کردہ اس عمارت میں فلیٹس کے لئے کارپوریشن سے گھر نمبر حاصل نہیں کیے گئے تھے۔ اور چار سال قبل تعمیرات کے موقع پر پانی اور بجلی کا جو عارضی کنکشن لیا گیا تھا اسی کے سہارے اب تک غیر قانونی طور پر بجلی اور پانی استعمال کیا جارہا تھا۔ میئر کویتا نے فوری اقدام کرتے ہوئے عمارت کا پانی کنکشن کاٹ دیا اور بلڈر کے خلاف کارروائی کرتے ہوئے اس پر جرمانہ عاید کرنے اور اس کے دوسرے تعمیراتی پروجیکٹس پر کام رکوانے کے احکام جاری کیے۔