منگلورو: شادی شدہ خاتون نقدی اور زیورات کے ساتھ گھر سے فرار۔ پولیس اسٹیشن میں شکایت درج
منگلورو12؍جولائی (ایس او نیوز)بینگرے کی رہنے والی ایک شادی شدہ خاتون 25ہزار روپے نقد اور سونے کے زیورات لے کر گھر سے فرار ہونے کی شکایت پانمبور پولیس اسٹیشن میں درج کی گئی ہے۔
مفرور خاتون کے شوہرفاروقی محی الدین کی جانب سے درج کی گئی شکایت کے مطابق 7جولائی کو وہ حسب معمول اپنے کام پر گیا ہواتھا۔شام4 بجے کے قریب اس کی بیوی امِّ سلمیٰ نے فون کرکے اسے بتایا کہ وہ بنگلورو جارہی ہے اس لیے اسے تلاش کرنے کی کوشش نہ کی جائے۔ پریشان حال محی الدین فوراً گھر واپس آیاتو دروازے پر تالا پڑا ہوا تھا۔ اس نے اڑوس پڑوس او رشتے داروں کے علاوہ بس اسٹانڈ، ریلورے اسٹیشن وغیرہ پر ام سلمیٰ کو تلاش کیا مگر کہیں بھی اس کا پتہ نہیں چلا۔
پھر9جولائی کوام سلمیٰ نے اپنے شوہر فاروقی کو فون کرکے بتایا کہ اس نے کسی اور کے ساتھ شادی کرلی ہے۔ اب آئندہ وہ ہرمہینے اسے ایک ہزار روپے بھیجا کرے گی۔ اتنا کہہ کر اس نے اپنا فون سوئچ آف کردیا۔پھر اس کے بعد کوئی رابطہ نہیں ہوسکا۔ ام سلمیٰ کے بارے میں کہا جاتا ہے کہ وہ پانچ فٹ لمبی، گورے رنگ اور گول چہرے والی خاتون ہے ۔ کنڑا، ہندی، انگلش ، اردو اور بیاری زبان جانتی ہے۔ اس کے تعلق سے کسی کو کچھ پتہ چلے تو پانمبور پولیس اسٹیشن میں اطلاع دینے کی گزارش کی گئی ہے۔