منگلورو:باپ کے قاتل بیٹے کوعدالت نے سنائی عمر قید کی سزا
منگلورو11؍اکتوبر (ایس او نیوز) شہر کے پرنسپال ڈسٹرکٹ سیشنس کورٹ نے اپنے باپ کے قتل میں ملوث ایک بیٹے کو عمر قیداور جرمانہ کی سزاسنائی ہے۔
تعزیرات ہندکی دفعہ 302کے تحت مجرم قراردئے جانے والے ڈولفی گوویز نے 14اپریل 2017کو اپنے باپ پال گوویز(83سال) اور اپنے بھائی اسٹینی گوویز(54سال) پر قاتلانہ حملہ کیا تھاجس میں پال کی جان چلی گئی تھی او راسٹینی گوویززخمی ہوگیا تھا۔موڈبیدری پولیس انسپکٹر رامچندرا نائک نے تحقیقات کے بعد چارج شیٹ داخل کی تھی۔
عدالت میں گواہوں کے بیانات درج ہونے اور سماعت مکمل ہونے کے بعدجج کڈالور ستیہ نارائن اچاریہ نے فصلہ سناتے ہوئے باپ کے قتل کے عمر قید اور دس ہزار روپے جرمانہ کا حکم دیا ۔ جرمانہ ادا نہ کرنے کی صورت میں مزید چھ ماہ کی قید کی سزا سنائی گئی۔ اس کے علاوہ بھائی پر حملے کے لئے دفعہ 307 کے تحت دس سال قید اور دس ہزار روپے جرمانہ کے علاوہ شہادت مٹانے کے لئے دفعہ ۲۰۱ کے تحت دس سال قید اور دس ہزارروپے جرمانہ کی سزاسنائی گئی ہے ۔ ساتھ ہی ڈولفی کو یہ حکم بھی دیا گیا ہے کہ اپنے بھائی اسٹینی گوویز کو پچاس ہزار روپے کا معاوضہ بھی ادا کرے۔