منگلورو16؍اکتوبر (ایس او نیوز) سمارٹ سٹی منصوبے کے تحت کدرولی میں تعمیر ہونے والے قصائی خانے پر جو تنازعہ بی جے پی اور ہندو تنظیموں نے کھڑا کیا ہے اس پرضلع انچارج وزیریوٹی قاد ر نے ایک اخباری کانفرنس سے خطاب کرتے ہوئے کہا کہ میں وزیرا عظم نریندر مودی اور شہری ترقیات کے وزیر کو مراسلہ بھیج کر قصائی خانے کی تعمیر کے تعلق سے اجازت اور واضح ہدایات طلب کروں گا۔

ضلع انچارج وزیر قادرکا کہنا تھا کہ :’’ صفائی اور حفظان صحت کو دھیان میں رکھ کرکدرولی میں 15کروڑ لاگت سے ایک جدید سہولتوں والا قصائی خانہ تعمیر کرنے کی تجویز سمارٹ سٹی منصوبے کے تحت بھیجی گئی تھی۔مگر اپوزیشن کی طرف سے اس پر حد سے زیادہ تنقید کی جارہی ہے جس سے مجھے بڑا دکھ ہوا ہے۔منتخب عوامی نمائندوں کو اس طرح الزام تراشی نہیں کرنی چاہیے تھی۔اس لئے میں وزیر اعظم اور وزیر شہری ترقیات کو مراسلہ بھیج کر ان سے قصائی خانے کے مسئلے پر واضح ہدایات اور اجازت حاصل کرنے کا فیصلہ کیا ہے۔میں اس مراسلے میں سمارٹ سٹی پروجیکٹ کے تحت گؤ شالا بنانے کی بھی گنجائش نکالنے کے بارے میں ان سے دریافت کروں گا ۔

وزیر موصوف نے کہا کہ زمینوں سے متعلق کنورژن کے بہت سارے مسائل موجود ہیں۔اس مسئلے پر ہم نے ریوینیو منسٹر اور اربن ڈیولپمنٹ سیکریٹری کے ساتھ میٹنگ کی ہے۔ہم نے فیصلہ کیا ہے کہ 12نومبر کو ڈپٹی کمشنر کے دفتر میں ’ریوینیو عدالت‘ منعقد کریں گے اور مسائل کو فوری طور پرحل کردیا جائے گا۔اس کے علاوہ ہم نے ڈی سی کو ہدایت دی ہے کہ12نومبر کو ریوینیو عدالت کے انعقاد سے پہلے تحصیلداراور سرویئر کی موجودگی میں تعلقہ سطح پر عدالتیں منعقد کی جائیں اور چھوٹے موٹے مسائل حل کرلیے جائیں۔