منگلورو میں موسلادھار برسات سے سڑکیں ندیوں میں تبدیل؛ سنیچر کو اسکولوں اور کالجوں میں چھٹی کا اعلان
منگلورو1 11/؍اگست (ایس او نیوز) شہر میں لگاتار اور زبردست بارش ہونے کی وجہ سے کئی علاقے زیر آب ہوگئے ہیں اور اکثر سڑکیں ندیوں او رتالابوں میں تبدیل ہوگئی ہیں ، جس کی وجہ سے عام زندگی بری طرح متاثر ہوئی ہے۔
بھاری بارش کو دیکھتے ہوئے ضلعی انتظامیہ نے سنیچر کو سبھی اسکولوں اور کالجوں میں چھٹی کا اعلان کیا ہے۔
مسلسل بارش سے جمعہ کو مینگلور کے مالیمار روڈ پر اس قدر پانی جمع ہوگیا تھا کہ کچھ گھنٹوں تک اس پر چلنا پھرنا یا موٹر گاڑیاں دوڑانا ممکن نہیں تھا۔کچھ ایسی ہی حالت کوٹارا چوکی کے مین روڈس کی تھی جہاں پانی جمع ہونے سے سڑک نظر ہی نہیں آرہی تھی۔کئی سڑکوں تک گھٹنوں سے اوپر تک پانی جمع ہوگیا جس سے وہاں سے گزرنے والوں کو بہت زیادہ مشکلات کا سامنا کرنا پڑا۔کئی جگہ ٹریفک جام کی کیفیت پید ا ہوگئی۔
برسات کا پانی سڑکوں کے ساتھ ساتھ کچھ گھروں کے کمپاونڈس میں بھی گھس گیا۔اس کے علاوہ ان علاقوں میں ڈرینیج سے بھی پانی ابلنا شروع ہوگیا جو عوام کے لئے مزید مصیبت کا سبب بن گیا ۔اس علاقے کے عوام کا کہنا ہے کہ اس سے پہلے بھی اس قسم کی صورتحال پید ا ہوچکی ہے مگر عوامی منتخب نمائندوں نے اس سلسلے میں تدارک کرنے کے لئے کسی بھی قسم کی کارروائی نہیں کی۔برساتی پانی جمع ہونے سے روکنے اور ڈرینیج کے مسائل حل کرنے کے جو وعدے سیاسی لیڈروں نے کیے تھے وہ بس وعدوں کی حد تک ہی رہے۔
دوسری طرف دھرمستھلا میں نیتراوتی ندی خطرے کے نشان سے اوپر بہنے لگی ہے۔سڑکوں پر سیلابی پانی کی وجہ سے دھرمستھلا آنے والے بھکتوں کو بڑی پریشانی سے گزرنا پڑ رہا ہے۔ جمعہ کو دوپہر سے بارش تیز ہوجانے اور سڑکوں پر پانی جمع ہونے سے اسکولی بچوں کے لئے گھر واپس لوٹنا دشوار کن مسئلہ بن گیا تھا۔
