منگلورو17؍فروری (ایس او نیوز) پانمبور پولیس نے ہائی وے پر ہلاکت خیز ہتھیار وں سے دھمکاکر ڈرائیوروں اور مسافروں کو لوٹنے والی ٹولی کے تین اراکین کو کودرے مکھ جنکشن کے پاس گرفتار کرلیا ہے۔

گرفتار ملزمین کے نام پردیپ کمار عرف پردیپ مینڈن(47سال)،سنیل (20سال) اور چرن شیٹھ بتائے جاتے ہیں۔جبکہ اس ٹولی میں شامل دو ملزمین بھرت اور نوین فرار ہونے میں کامیاب ہوگئے ہیں۔پولیس کے بیان کے مطابق گرفتار ملزمین کے پاس سے مرچی کا پاوڈر، رسّی اور تلواریں ضبط کی گئی ہیں۔

پولیس تفتیش کے دوران اس بات کا بھی انکشاف ہوا ہے کہ حالیہ دنوں میں ہوئے شیوراج کے قتل کا بدلہ لینے کے لئے ان لوگوں نے انیش گینگ میں شامل افراد کو جوابی حملے میں قتل کرنے اور دوسری ریاستوں میں روپوش ہونے کامنصوبہ بنایاتھا ۔ اس منصوبے پر عمل درآمد کے لئے انہیں اچھی خاصی رقم درکار تھی ، جسے جمع کرنے کے لئے ان لوگوں نے مسافروں کو لوٹنے کا سلسلہ شروع کیا تھا۔ملزم پردیپ کے بارے میں بتایا جاتا ہے کہ منگلورو سٹی میں اس پر 14مختلف معاملات درج ہیں جبکہ چرن شیٹھ4معاملات میں شامل ہے۔

ملزمین کے بارے میں مصدقہ اطلاع ملنے پر سب انسپکٹر امیش کمار نے اپنے عملے کے ساتھ صبح 4بجے کے قریب کارروائی اور انہیں گرفتار کرلیا۔