منگلورو18؍دسمبر (ایس او نیوز)سابق مرکزی وزیر پلّم راجو نے منگلورو میں میڈیا سے بات چیت کے دوران مطالبہ کیا کہ جنگی ہوائی جہاز ریفائیل کی خریداری میں ہوئی بدعنوانی کے تعلق سے تحقیقات کے لئے جوائنٹ پارلیمنٹری کمیٹی تشکیل دی جانی چاہیے ۔ کیونکہ سپریم کورٹ نے مرکزی حکومت کی طرف سے داخل کردہ حلفیہ جھوٹے بیان کی بنیاد پر اس معاملے میں مداخلت نہ کرنے کا فیصلہ سنایا ہے۔

پلّم راجو نے کہاکہ فائٹرجیٹ ہوائی جہازوں کی قیمتوں میں اس قدر اضافے کا آخر سبب کیا ہے اور HALکمپنی کو ہٹاکر ریلائنس کو اس معاہدے میں شریک کرنے کامقصدکیا ہے۔اس کی پوری طرح جانچ ہونی چاہیے۔ہم نے اس قسم کے بہت سے سوالات اٹھائے ہیں جن کے جواب نہیں مل رہے ہیں۔ انہوں نے کہا کہ کانگریس نے ہمیشہ یہ بات کہی ہے کہ سپریم کورٹ اس کے لئے مناسب فورم نہیں ہے۔ اس لئے مشترکہ پارلیمانی کمیٹی کی تحقیقات سے حقائق ملک کے عوام کے سامنے آنے چاہئیں۔

پریس کانفرنس کے موقع پر سابق رکن اسمبلی جے آر لوبو اور دیگر کانگریسی لیڈران موجود تھے۔