اُلائی بیٹو فساد کے تعلق سے وجرے دیہی مٹھ سوامی کو عدالت میں حاضری کا سمن جاری
منگلورو،19؍جنوری (ایس او نیوز)منگلورو سے قریب اُلائی بیٹو نامی مقام پر9دسمبر 2014کو ہوئے فساد سے متعلق معاملے کی سماعت کے دوران منگلورو کی سیکنڈ جے ایم ایف سی عدالت نے گروپور کے وجرے دیہی مٹھ کے سوامی راج شیکھرا نندا کو شخصی طور پر عدالت میں حاضر رہنے کا سمن جاری کردیا ہے۔
دراصل واقعہ یہ تھا کہ بابابڈھن گری اور دتا پیٹا تنازعے کے پس منظر میں وشواہندوپریشد ہندو، بجرنگ دل اوردیگر ہندو تنظیموں نے یہ الزام لگاتے ہوئے احتجاجی مظاہرہ کیا تھا کہ دتا پیٹا کے لئے جانے والے بھکتوں پر بلا وجہ حملے کیے گئے ہیں۔اس سلسلے میں وامنجور سے اُلائی بیٹو تک احتجاجی ریالی نکالی گئی تھی۔
پولیس نے مظاہرین کو احتیاطی اقدام کے طور پر پاراری نامی علاقے میں روک لیا تھا۔اس پر مظاہرین سنگ باری کرتے ہوئے تشدد پر آمادہ ہوگئے اور سڑک پر لیٹ گئے۔اس موقع پرپولیس نے حالات پر قابو پانے کے لئے لاٹھی چارج کا سہارا لیا تھا۔اسی معاملے میں وجرے دیہی مٹھ کے سوامی بھی ایک ملز م ہیں جن سے جرح کرنے کے لئے عدالت نے انہیں شخصی طور پر حاضرہونے کا سمن جاری کیا ہے۔