منگلورو:سی سی بی پولیس نے قتل ساز ش کو کیا ناکام۔ ہتھیارسمیت4ملزمین گرفتار
منگلورو، 4؍جنوری (ایس او نیوز) منگلورو سٹی کرائم برانچ بروقت کارروائی کرتے ہوئے فالنیر کے علاقے میں انجام دی جانے والی قتل اور ڈکیتی کی سازش کو ناکام بنادیا اور ہتھیارسمیت 4ملزمین کو گرفتار کرلیا جس میں ایک راؤڈی شیٹر بھی شامل ہے۔
موصولہ رپورٹ کے مطابق سی سی بی کو مصدقہ اطلاع ملی تھی کہ مولکی میں چتراپور کے قریب ایک ٹاٹا سومو میں تقریباً دس لوگ موجود ہیں اور وہ قتل اور ڈکیتی کے منصوبے پر عمل کی تیاری کررہے ہیں۔پولیس نے مذکورہ مقام پر چھاپہ مارا تو چار ملزمین اس کے ہاتھ لگے جن کی شناخت منوج کمار (33سال)، پرساد عرف پچّو(28سال)،شراون (22سال) اور سجیت (27سال) بتائی گئی ہے۔ملزموں کے پاس سے ایک چھوٹی تلوار،ایک کلہاڑی،کچھ چاقواور 40 گرام گانجہ ضبط کیا گیا ہے۔ اس کے علاوہ پولیس نے وہ ٹاٹا سومو کار بھی ضبط کی ہے جس میں یہ لوگ ارتکاب جرم کا منصوبہ بنارہے تھے۔ضبط شدہ اشیاء کی مالیت کا تخمینہ 1.90لاکھ روپے لگایا گیا ہے۔اس سازش میں ملوث بقیہ افراد کی تلاش کی جارہی ہے۔
گرفتار ملزمین میں سے پرساد کے بارے میں پولیس نے بتایا ہے کہ وہ ایک راؤڈی شیٹر ہے جس پر الال پولیس اسٹیشن میں دو حملوں کے معاملات درج ہیں۔اس کے علاوہ منگلورو نارتھ پولیس اسٹیشن کے حدود میں ایک قتل اورتین اقدام قتل کے معاملات درج ہیں۔ملزم منوج اور شراون کے تعلق سے پولیس کا بیان ہے کہ ان پر اقدم قتل کا ایک کیس الال پولیس اسٹیشن میں درج ہے۔سی سی بی پولیس نے ملزمین کو ضبط شدہ مال کے ساتھ اگلی تحقیقات کے لئے منگلورو ساؤتھ پولیس کے حوالے کیا ہے۔