منگلورو سمیت پانچ مقامات پرریپڈ ایکشن فورس کے نئے مراکز قائم ہونگے
منگلورو8؍اکتوبر (ایس او نیوز) سنٹرل ریزرو فورس کی ایک شاخ ریپڈ ایکشن فورس(آر اے ایف) جو کہ فسادات کو قابومیں کرنے کی خصوصی مہارت رکھتی ہے،ملک بھر میں اس کے پانچ نئے مراکزقائم کرنے کا فیصلہ مرکزی حکومت نے کیا ہے۔ ان پانچ مراکز کے لئے جومقامات منتخب کیے گئے ہیں اس میں منگلورو بھی شامل ہے۔ اس طرح کرناٹکا میں ریاپڈ ایکشن فورس کا یہ پہلا مرکز ہوگا۔
فی الحال ملک میں آر اے ایف کے مراکزنئی دہلی، علی گڑھ، جمشید پور، کوئمبتور، ممبئی، بھوپال ، میرٹھ، حیدرآباد، الہ آباد اور احمد آباد میں موجود ہیں۔اب مرکزی حکومت نے جن پانچ مقامات کو منتخب کیا ہے ان میں منگلورو کے علاوہ واراناسی، جئے پور، حاجی پور(بہار)اور نوح (ہریانہ) شامل ہیں ۔ اس طرح اب ملک میں آر اے ایف کے جملہ 15مراکز ہونگے۔
منگلورو سٹی پولیس کمشنر ٹی آر سریش نے بتایا کہ آر اے ایف کیمپ کے لئے دو سال قبل تجویز پیش کرتے وقت ہی بجپے اور مرور میں زمین کی نشاندہی کی گئی ہے۔انہوں نے یہ بھی بتایا کہ اس ضمن میں منگلورو کمشنریٹ کو ابھی کوئی اطلاع موصول نہیں ہوئی ہے، کیونکہ اس سے متعلقہ گفت و شنید حکومتی سطح پر کی گئی ہے۔
ریپڈ ایکشن فورس اپنے مخصوص یونیفارم اورساز وسامان کے ساتھ اپنی الگ پہچان رکھتی ہے۔ اس کی تربیت اس انداز سے کی جاتی ہے کہ یہ فسادات پر قابو پانے کے علاوہ زلزلے، طوفان اور سیلاب جیسے قدرتی آفات کے موقع پربھی دیگر فورسس کے ساتھ مل کر راحت رسانی کے کام میں تعاون کیا کرتی ہے۔