منگلورو ایئر پورٹ پر27لاکھ روپے مالیت کا سونااسمگلنگ کی کوشش ناکام۔2مسافر گرفتار
منگلورو11؍مارچ (ایس او نیوز) منگلورو انٹرنیشنل ایئر پورٹ پر سونا اسمگل کرنے کی کوششوں میں آج کل کچھ زیادہ ہی اضافہ دکھائی دینے لگا ہے۔ تازہ معاملے میں ایئر انڈیا ایکسپریس طیارے کے ذریعے دبئی سے آنے والے دو مسافروں کے پاس سے سونا سفوف اور پیسٹ کی شکل میں27لاکھ روپے مالیت کاسونا ضبط کیا گیا ہے۔
موصولہ رپورٹ کے مطابق ایک مسافر کے پاس 458.48گرام سونا تھا جس کی قیمت 15.92 لاکھ روپے اور دوسرے مسافر کے پاس سے 335.47گرام سونا ملا جس کی مالیت 11لاکھ روپے بتائی جاتی ہے۔ ان دونوں مسافروں نے یہ سونا کسٹمز کی نظروں سے بچاکر ایئر پورٹ سے باہر اسمگل کرنے کی نیت سے اپنے مقعد میں چھپاکر رکھا تھا ۔مگر مسافروں کی سختی کے ساتھ تلاشی کے دوران یہ دونوں کسٹمز کے ہتھے چڑھ گئے۔