منگلورو،29؍ستمبر(ایس او نیوز) منگلورو اینٹی کرپشن بیوریو کے افسران نے کرناٹکا ہاؤسنگ بورڈ(کے ایچ بی)کے ایک آفیسر کورشوت لیتے ہوئے رنگے ہاتھوں گرفتار کرلیا جبکہ دوسرا مفرور بتایا جارہا ہے۔

موصولہ رپورٹ کے مطابق اڈیا پاڈی بجپے کے رہنے والے گنگادھر کے پرکھوں نے کرناٹکا ہاؤسنگ بورڈ سے گھر کی تعمیر کے لئے قرضہ لیا تھا۔یہ پورا قرضہ بے باق کرنے کے بعد گنگادھر نے جب بطور ضمانت رکھے گئے اپنے گھر کے دستاویزات واپس طلب کیے تو کرناٹکا ہاؤسنگ بورڈ جنوبی کینرا کے ایکزیکٹیو انجینئر وجیا کمار اور اسسٹنٹ ریوینیو آفیسر سرینواس شیٹی نے دستاویزات لوٹانے اور نو آبجکشن سرٹفکیٹ دینے کے لئے 20ہزار روپوں کی رشوت طلب کی۔ بہت زیادہ گفت و شنید کے بعدمعاملہ 12ہزار روپے پر طے ہوا۔ گنگادھر نے 2ہزار روپے موقع پر ہی دئے اور بقیہ دس ہزار روپے دوسرے دن دینے کا وعدہ کیا۔
دوسرے دن گنگادھر نے اے سی بی پولیس کے پاس شکایت درج کروائی اور منصوبہ بندی کے ساتھ رقم دینے کے لئے ہاؤسنگ بورڈ کے دفتر پہنچا۔مگر اس وقت ایکزیکٹیو انجینئر وجیا کمار دفتر سے باہر گیا ہواتھا۔ اس لئے گنگادھر نے اسسٹنٹ ریوینیو آفیسر سرینواس کو وہ رقم دی اور اسی وقت اے سی بی ٹیم نے چھاپہ مار کر سرینواس شیٹی کو رنگے ہاتھوں حراست میں لے لیا۔معلوم ہوا ہے کہ اے سی بی کی طرف سے چھاپہ ماری کی اطلاع ملنے پر وجیا کمار فرار ہوگیا ہے۔

اے سی بی سپرنٹنڈنٹ شروتی این ایس، ڈی وائی ایس پی سدھیر کمار ہیگڈے، انسپکٹر یوگیش کمار اور دیگر عملے نے اس مہم میں حصہ لیا۔