منگلورو:سی سی بی کانسٹیبل اور مجرم کے بیچ لین دین کا معاملہ۔ آڈیو کلپ ہوگئی وائرل
منگلورو6؍ستمبر (ایس او نیوز) مختلف جرائم میں ملوث ایک معروف غنڈے کے ساتھ منگلورو سی سی بی پولیس کانسٹیبل کی بات چیت کا آڈیو کلپ سوشیل میڈیا پر وائرل ہوگئی ہے۔ موصولہ رپورٹ کے مطابق مبینہ بات چیت پیسے کے لین دین اور دیگر معاملات پر مشتمل ہے جو سی سی بی کانسٹیبل نے کیرالہ اور کرناٹکا میں انجام دئے گئے کئی جرائم میں ملوث تلکّی رفیق کے بیچ ٹیلی فون پر ہوئی ہے۔
معروف مجرم رفیق کے ساتھ معاملہ کرنے والے سی سی بی کانسٹیبل کا نام چندر بتایا جاتا ہے۔ ملیالم زبان میں ہوئی بات چیت کے بارے میں معلوم ہوا ہے کہ مذکورہ کانسٹیبل رفیق کو اس کے مخالف گینگ سے وابستہ افراد کی موبائل لوکیشن اور ان کے ٹھکانوں کے تعلق سے معلومات فراہم کیا کرتا تھا۔ اس میں روپے پیسے کے لین دین کے تعلق سے بھی بات چیت ریکارڈ کی گئی ہے۔ بتایاجاتا ہے کہ کانسٹیبل کی طرف سے فراہم کی گئی معلومات کو بنیا د بناکر رفیق اپنی کارروائیاں انجام دیا کرتاتھا۔
اس بارے میں منگلورو پولیس کمشنر نے کہا ہے کہ ایک مجرم کے ساتھ پولیس عملے کی ٹیلی فون پر ہوئی گفتگو وائرل ہونے کی بات ان کے علم میں آئی ہے اور انہوں نے اس تعلق سے تحقیقات کا حکم دیا ہے۔ اس کے علاوہ محکمہ پولیس کے پاس موجود یہ آڈیو کلپ کیسے دوسروں کے ہاتھ لگی اور سوشیل میڈیا پر کیسے وائرل ہوگئی ،اس بات کی بھی تحقیقات کی جائے گی ۔