منگلورو22؍جنوری (ایس او نیوز) پانمبور پولیس اسٹیشن کے حدود میں تانیر بھاوی چرچ کے پاس واقع اپنے گھر کے ٹیریس پر سوئے ہوئے شخص کو تین اجنبی حملہ آوروں نے قتل کرڈالا ہے۔

موصولہ رپورٹ کے مطابق مقتول کانام شیوراج (45سال)ہے۔ اس کا چھوٹا بھائی بھرتیش ایک راؤڈی شیٹر ہے اور مینڈن گینگ کا گُرگا ہے۔ اور بیجائی راجا مرڈر کیس میں ایک مشتبہ ملزم ہے۔پولیس کو شبہ ہے کہ یہ ایک گینگ وار کامعاملہ اور بھرتیش سے بدلہ چکانے کے لئے ہی اس کے بھائی شیوراج کا قتل کیا گیا ہے۔صبح چار اور پانچ بجے کے دوران جب انجان قاتلوں نے تیز دھاروالے ہتھیاروں سے شیوراج پر حملہ کیا تو اس وقت وہ اپنے گھر کے ٹیریس پر گہری نیند سورہاتھا۔ بری طرح زخمی شیوراج کواسپتال لے جایا گیا مگر اس نے زخموں کی تاب نہ لاتے ہوئے دم توڑ دیا۔

قتل کی واردات کی خبر ملنے پر پانمبور پولیس نے موقع پر پہنچ کر معائنہ کیا اور معاملہ درج کرتے ہوئے تحقیقات شروع کی ہے۔