منگلورو:پرائیویٹ بس کی ٹکر سے بائک پر سوار 11سالہ بچی ہلاک۔2شدید زخمی
منگلورو 13؍اگست (ایس ا ونیوز)نانتھور کے قریب ایک پرائیویٹ بس نے بائک کو اوور ٹیک کرنے کی کوشش میں ٹکر ماردی جس کے نتیجے میں بائک پر سوار مدیحہ (11سال) نامی بچی ہلاک ہوگئی جبکہ بچی کی ماں نورجہاں اور اس کا بھائی طیب انصار(4سال) شدید زخمی ہوگئے ہیں اور انہیں علاج کے لئے اسپتال میں داخل کیا گیا ہے۔
بتایا جاتا ہے شیموگہ کے رہنے والے روشن اور نورجہاں نے اپنے بچوں کے ساتھ ابھی 3 مہینے قبل سورتکل میں کرایے کے مکان میں رہنا شروع کیا تھا۔ روشن بنگلورو میں ملازمت کرتا ہے اور اس کی بڑی بیٹی بھی وہیں پر تعلیم حاصل کررہی ہے۔ حادثہ اس وقت پیش آیا جب نورجہاں اپنے دو بچوں کے ساتھ بائک پر سوار ہوکر کسی رشتے دار کی شادی میں شرکت کے لئے جارہی تھی۔ نانتھور کے قریب اڈپی سے منگلورو جانے والی ایک پرائیویٹ بس نے انہیں اوور ٹیک کرنے کی کوشش کی جس کے دوران ٹکر لگنے سے بائک سمیت تینوں سوار سڑک پر گر گئے۔ مدیحہ سنگین طور پر زخمی ہوگئی تھی اور اس نے اسپتال پہنچنے پر دم توڑ دیا۔