منگلورو26؍فروری (ایس او نیوز) وزیر اعلیٰ کیرالہ کی منگلورو ہم آہنگی ریالی میں شرکت کی مخالفت کرنے والوں کو چپلوں سے مارنے والا بیان دینے کے بعداپنے خلاف اٹھنے والے تنازعے کو کم کرنے کے لئے ریاستی وزیر غذا جناب یو ٹی قادر نے وضاحت جاری کرتے ہوئے کہا کہ ان کا مقصد کسی کی توہین اور بے عزتی کرنا نہیں تھا۔

انہوں نے کہا کہ ایک دستوری طور پر منتخب بزرگ لیڈرجو پڑوسی ریاست سے ہمارا مہمان بن کر آیا ہو، اس کا احترام نہ کرنے اور اس کا استقبال کرنے کے بجائے اس کی آمد کو روکنے کی جو کوشش ہوئی تھی، اس سے ان کے جذبات مجروح ہوئے تھے۔ اور اسی اندرونی درد کی وجہ سے انہوں نے ایسی سخت زبان استعمال کی تھی۔ خیال رہے کہ مسٹر یو ٹی قادر نے ایک پروگرام کے دوران کہا تھا کہ کیرالہ کے وزیر اعلیٰ کی مخالفت کرنے والے ان کی جوتیوں کے برابر بھی نہیں ہیں اور دستور کی مخالفت کرنے والوں کو چپلوں سے مارنا چاہیے۔