منگلورو/کوناجے :24/مارچ(ایس اؤ نیوز)نابالغ طالبہ سے دوستی رچاکر شادی کا جھانسہ دے کر پچھلے کئی دنوں سے مسلسل جسمانی تعلقات قائم کرتے ہوئے طالبہ کو 5ماہ کی حاملہ بنانے والے نجی ٹی وی چینل کے کیمرہ مین کو محکمہ اطفال کمیٹی کی صلاح پر متاثرہ کی طرف سے درج کی گئی شکایت پر کارروائی کرتے ہوئے کوناجے کی پولس نے پوسکو  قانون کے تحت گرفتارکرکے کیس درج کرلیا ہے۔

گرفتار شدہ ملزم کی شناخت کوناجے میں مقیم انوپ جوگی (26) کی حیثیت سے کی گئی ہے۔ ملزم انو پ جوگی گذشتہ اپریل میں سالیتور نامی گاؤں میں ایک پروگرام کے لئے گیا تھا۔ اس دوران وہاں پجیر کی ایک طالبہ سے دوستی ہوئی ، اس کے بعد دوستی قائم رکھتے ہوئے طالبہ کے گھر پہنچا اور انہیں شادی رچانے کا جھانسہ دے کر اس کے ساتھ لگاتار جسمانی تعلقات قائم کرتے ہوئے اُسے حاملہ  کردیا۔

کوناجے پولس تھانے میں شکایت درج کرتے ہوئے متاثرہ نہم جماعت کی طالبہ نے کہاہے کہ میں نے حاملہ ہونےکی بات انوپ کو ستمبر میں ہی بتائی تھی، تب اس نے قتل کی دھمکی دیتے ہوئے کہاکہ یہ بات کسی کو بتاؤگی تو قتل کردونگا۔ طالبہ کی شکایت قبول کرتے ہوئے پولس نے منگلورو کے لیڈیگوشن اسپتال میں متاثرہ کا میڈیکل ٹسٹ کرایا  ۔ میڈیکل رپورٹ پر ملزم انوپ کو گرفتارکرنے کے بعد اس کے خلاف 506(آئی پی سی ) 5(جے2)6پوکسو 2012کے تحت مقدمہ درج کرلیا گیا اور ملزم کو عدالت میں پیش کیا گیا۔ملزم انوپ گذشتہ کچھ مہینے پہلے اُلال کے علاقہ میں کیمرہ مین کے طورپر کام کرنے کے بعد بنگلورو کے ایک چنیل میں بطور کیمرہ مین کی حیثیت سے کام کرنے کی اطلاع موصول ہوئی ہے۔