منگلورو میں نئے عاشق کے ساتھ مل کر پرانے عاشق کا قتل۔ عدالت نے سنائی 2 ملزمین کو عمر قید کی سزا
منگلورو5؍اگست (ایس او نیوز) تکونے عشق اور قتل کے ایک معاملے میں نئے عاشق کے ساتھ مل کر اپنے پرانے عاشق کو قتل کرنے کاالزام ثابت ہونے پر 6th ایڈیشنل ڈسٹرکٹ اینڈ سیشنس کورٹ کی طرف سے2 ملزمین کو 25ہزار روپے فی کس جرمانہ اورسزائے عمر قید سنائی گئی ہے۔
موصولہ تفصیلات کے مطابق سزا پانے والے مجرمین کی شناخت ٹمکور ضلع کے ٹیپتور کے رہنے والے گاوی رنگا عرف رنگا (۲۸سال) اور مولکی کرناڈ کی رہنے والی سشما پریسیلا کے بطور کی گئی ہے۔جبکہ مقتول کا نام اویناش سوورنا (۲۸سال)ہے جو کہ کارکلا کا رہنے والا تھا۔
بتایا جاتا ہے کہ سشما پریسیلا پہلے اویناش کے عشق میں مبتلا ہوئی پھر اس کے ساتھ ہی وہ گاوی رنگا سے بھی محبت کرنے لگی ۔ اس کے بعد پریسیلا نے گاوی رنگا کے ساتھ مل کر اویناش کا قتل کرتے ہوئے اسے راستے سے ہٹا دیا۔قتل کا یہ معاملہ 2014میں پیش آیا تھا جب کار سے ٹکر کے نتیجے میں اویناش ہلاک ہوگیا تھا۔ اس کیس کی تحقیقات کرتے ہوئے مولکی سرکل انسپکٹر رامچندرا نائک نے عدالت میں چارج شیٹ داخل کی تھی۔
عدالت میں اس معاملے کی سماعت کے بعد رنگا کو دفعہ 302کے تحت قتل کا مجرم اور سشما پریسیلا کو قتل پر اکسانے اور اس میں تعاون کرنے کے لئے مجرم قرار دیتے ہوئے دونوں کو عمر قید اورفی کس 25ہزار روپے جرمانہ کی سزا سنائی گئی۔اور جرمانہ ادا نہ کرنے کی صورت میں مجرمین کو مزید دو مہینے کی سزا جیل میں کاٹنے ہوگی۔ عدالت کے فیصلے کے مطابق جرمانے کی رقم میں سے 40ہزار روپے اویناش کے والد کو معاوضے کے طورپر اداکیے جائیں گے۔