منگلورو :19/ستمبر(ایس اؤ نیوز) لاری ڈرائیورکے قتل کے معاملے میں گرفتارکردہ ملزم رام نگر ضلع کے اسد اللہ شریف (50)کو پولس کسٹڈی میں دیا گیا ہے۔ اس  معاملے میں مزید کئی لوگوں کے  ملوث ہونے کاشبہ ہے جن کی گرفتاری کے لئے  پولس  نے  جال بچھادیا  ہے۔

28اگست کو سگما کمپنی کا ڈرائیورانیل کمار مینگلور کے  بائیکم پاڑی کے روچی سویا انڈسٹریز سے 7.50لاکھ روپئے مالیت کے 1050باکس تیل لے کر بنگلورو روانہ ہواتھا۔ لیکن جب تیل لے کر لاری متعینہ مقام پر نہیں  پہنچی تو شیوگنیشن ٹرانسپورٹ کے مالک نے 30ستمبر کو پنمبور پولس تھانہ میں لاری سمیت ڈرائیور کے گمشدگی کی شکایت درج کرائی۔

پنمبورپولس تھانہ کے انسپکٹر کے ایم رفیق اور ایس آئی امیش کمار نے معاملے کی تفتیش شروع کی تو پتہ چلا کہ  رام نگر کا رہنے والا اسداللہ شریف اس کے قتل میں ملوث ہے، جو   بنگلورو کے تعلقہ کمبی پور دیہات میں مقیم ہے۔ پولس نے فوری طورپر اسد اللہ کو اپنی تحویل میں لے کر پوچھ تاچھ کی تو ملزم اسداللہ نے قبول کیا کہ اُس نے اپنے  ساتھیوں کے ساتھ انیل کا قتل کرکے نعش کو رام نگر ضلع کے کمبلگوڈو میں لٹکا دیا تھا اور لاری کا مال لوٹ کروہ اور ان کے ساتھی  فرار ہوگئے تھے۔

ڈرائیور انیل کمار کی نعش کو بنگلورو جنوبی معاون زونل افسر کی نگرانی میں باہر نکالی گئی ، پھرپوسٹ مارٹم کرنے کے بعد نعش گھروالوں کے حوالے کی گئی ۔ ملزموں کے خلاف قتل کا کیس درج کرلیاگیا ہے۔ گرفتارشدہ ملزم کو عدالت میں پیش کرنے کے بعد زائد جانچ کے لئے پولس کسٹڈی میں دیا گیا ہے جہاں ملزم سے پوچھ تاچھ جاری ہے۔