منگلورومیں نئےپولس کمشنرکا تقرر رد : دیا نند، ناگراج اور راجپا میں کسی ایک کا تقرر ہونے کی توقع
منگلورو:27/مئی (ایس اؤنیوز) منگلورو پولس کمشنر کے عہدے پر نئے کمشنر کے طورپر این، ستیش کمار کا تقرر کرتے ہوئے جمعرات کو جاری کئے گئے حکم نامے کو رد کئے جانےکی سرکاری ذرائع نے خبر دی ہے۔ این، ستیش کمار کو منگلورو پولس کمشنر کے عہدے پر تقرر کرنےکا آر ڈر جاری ہوتے ہی دکشن کنڑا ضلع کے کانگریس وزراء، ارکان اسمبلی نے سخت بے اطمینانی کا اظہار کرتے ہوئے حکم نامے پر نظر ثانی کی ا پیل کی تھی جس کے تحت حکومت نے تبادلہ آرڈر کو رد کرنے کی بات کہی ہے البتہ اس تعلق سے مصدقہ طورپر سرکلر کا جاری ہونا باقی ہے۔
این ستیش کمار جب دکشن کنڑا ضلع کے ایس پی تھے تو دکشن کنڑاضلع میں قانونی نظام کو لے کر لوگوں نے بہت ساری شکایات کی تھیں۔ ملک اور بیرون ملک سطح پر منگلورو کو بدنام کرنے والے واقعات اور منگلورو کی پیشانی پر بٹہ لگانے والے چرچوں پر حملوں جیسےمعاملات اور چر چ میں اپنی عبادت میں مگن بھگتوں پر حملہ کئے جانے والے واقعات انہی کے ایس پی کے دور میں پیش آئے تھے انہی وجوہات کی بنا پر ان کے تعلق سے بے اطمینانی کا اظہار کیا گیا تھا۔ دراصل کانگریسی وزراء اور ارکان اسمبلی نے اس بات کو لے کربھی ناراض تھے کہ امسال ودھان سبھا کے انتخابات ہونے والے ہیں ایسے میں منگلورو کمشنر جیسے اہم عہدے پر ان کا تقرر کرنے سے ضلعی عوام میں ایک غلط پیغام چلا جاتاہےاور عوام سخت ناراض ہونے کا خوف تھا۔
اس سلسلے میں بات کرتے ہوئے وزیر یوٹی قادر نے بتایاکہ جب میں رکن اسمبلی تھا تو اُلال حدود کے ایک چرچ میں لوگ جمع تھے انہیں منتشر کرنے کے لئے پولس نے لاٹھی چارج کیا تھا، اس دوران میں بھی وہاں تھا میں نے خود ضلع ایس پی ستیش کمار کو صبر وسکون اور تحمل سے کام لینے کوکہا تو انہوں نے میری باتوں کو نظر انداز کرتے ہوئے چرچ کے اندر گھس کر اندر موجود بھگتوں کو باہر نکالاتھا، اس کے بعد ہی ضلع کے مختلف مقامات پر شرپسندوں نے کئی کارستانیوں کو انجام دیا تھا۔ اس وقت ضلع کے حالات کو قابو میں کرنے میں وہ پوری طرح ناکام ہوئے تھےانہی باتوں کی طرف میں نے وزیرا علیٰ سدرامیا کی توجہ دلائی۔ ضلع میں امن وسکون بحال رکھنے اورشرپسندوں کو حدمیں رکھنے کے لئے ایک سخت پولس افسر کی یہاں ضرور ت ہے ، انہی واقعات کے پس منظرکو لے کر این ستیش کمار کا تبادلہ رد کئے جانے کی بات کہی جارہی ہے۔
منگلورو پولس کمشنر کے عہدے کے لئے اس سے قبل دکشن کنڑا ضلع میں ایس پی عہدے پر فائز تین آئی پی ایس افسران کا نام فہرست میں شامل ہونےکی بات کہی جارہی ہے، جن میں دیا نند، ناگراج اور راجپا کے نام سرفہرست ہیں۔
