منگلورو:26/جولائی (ایس اؤنیوز)منگلور و مہانگر پالیکا کی میئر کویتا سنیل کی قیادت میں پالیکا افسران اور ٹرافک پولس کے ہمراہ شہر کے اسٹیٹ بینک بس اسٹانڈ کے سڑک کنارے موجود دکانوں کو نکال باہر کرنے کی کارروائی انجام دی گئی ۔

بدھ کو پالیکا افسران ، عملہ اور ٹرافک پولس کے ساتھ اسٹیٹ بینک سے پی وی ایس سرکل تک کا پیدل دورہ کرتے ہوئے میئر کویتا سنیل سڑک کنارے موجود باکڑا دکانوں ، اشتہاری بورڈوں ، پارکنگ کے لئے قبضہ کئے جگہوں وغیرہ کو نکال ہاہر کیا۔ سڑک کنارے لگائی گئی پھلوں ، پھولوں ، ٹی شاپ جیسے باکڑا دکان مالکان کو پالیکا کے افسران نے جگہ خالی کرنےکی ہدایت دیتے ہوئے کہاکہ اگر دوبارہ نظر آئے تو پورا اٹھا کر پالیکا لے جانےکی تنبیہ دی۔ پارکنگ وغیرہ کے لئے سرکاری زمین پر قبضہ کئے کئی ایک تجارتی کامپلکس اور دکانوں کے مالکان کو بھی سخت وارننگ دیتے ہوئے کہا گیا کہ وہ اپنی رجسٹرڈ زمین کی حدود میں رہیں ورنہ قانونی کارروائی کرنےکی دھمکی دی گئی ۔ اسی طرح سڑک کنارے لگائے گئے ہورڈنگس، بڑے بڑے اور چھوٹے اشتہاری بورڈس کو بھی عملہ نے پھاڑ ڈالا یا نکال لیا۔

پالیکا کارروائی کو دیکھتے ہوئے سڑک کنارے باکڑا دکانداروں نے ہمپن کٹا اسٹیٹ بینک کے قریب پالیکا کے خلاف سخت برہمی کااظہا ر کرتے ہوئے میئر کے خلاف نعرے بازی کی اور احتجاج کرنے لگے ۔ باکڑادکانداروں کا کہنا تھا کہ متبادل انتظامات کئے غریب دکانداروں کو نکال باہر کرتےہوئے پالیکا نے بہت بڑی بے انصافی کی ہے۔ کارروائی کے بعد میئر کویتا سنیل نے اخبارنویسوں سے گفتگو کرتے ہوئے بتایا کہ دکانداروں کے لئے اسٹیٹ بینک کے پاس 208دکانداروں کے لئے سہولت فراہم کی گئی ہے لیکن کوئی بھی اس کا استعمال نہیں کررہاہے، فی الحال آ ج ہم نے دورہ کرتےہوئے معائنہ کیا اور ضروری ہدایات دی ہیں، راستے کنارے لگائے جانے والے دکانوں کی وجہ سے راہ گیروں کو بڑی دقت ہونے کی بات کہی۔ خیال رہے کہ کچھ روز پہلے میئر اور ان کی ٹیم نے غیر قانونی سکیل گیم سنٹرس اور مساج پارلر پر چھاپہ ماراتھا۔ کارروائی کے دوران میئر کے ساتھ ڈی سی پی ہنومنت رایا اور ٹرافک اے سی پی تلک چندرا موجود تھے۔