منگلورو:شریعت کا عملی نمونہ ہی غلط فہمیوں کو دور کرسکتاہے: مسلم پرسنل لاء جلسہ میں محمد کوئیں کا خطاب
منگلورو:30/اپریل(ایس اؤنیوز)موجودہ دنیا میں سرمایہ دار اپنےمفاد کے لئے سوشیل نیٹ ورک، میڈیاکے ذریعے اسلام اور مسلمانوں کے متعلق دیگر مذاہب کے لوگوں کو متعصب بنانے کی کوشش میں ہیں، اسلاموفوبیا کے نام پر عوام میں خوف پید اکیا جارہاہے، اگر مسلمان اس ماحول سے باہر آنا چاہتے ہیں ، غلط فہمیوں کو دورکرنا چاہتے ہیں تو ان کے لئے ایک ہی ذریعہ ہے وہ یہ کہ مسلمان قرآن اورنبی اکرم ﷺکی سیرت کو اپنا کر دنیا کے سامنے عملی نمونہ پیش کریں ، حالات ہمیں مجبور کررہے ہیں کہ ہم خود اسلام کی طرف لپکیں۔ ان خیالات کا اظہار جماعت اسلامی ہند کرناٹکا کے رکن ِ شوریٰ ، توکوٹو جمعہ مسجد کے خطیب محمد کوئیں نےکیا۔
جماعت اسلامی ہند کی ملک گیر مسلم پرسنل لاء بیداری مہم کی مناسبت سے منگلورو کے جماعت اسلامی ہند بولار۔جپو کی طرف سے مارنمی کٹے کے نایکس گراؤنڈ میں منعقدہ عوامی اجلاس میں مہمان خصوصی کی حیثیت سے خطاب کررہے تھے۔ محمد کوئیں نے کہاکہ ایسا خول پید اکیا گیا ہے کہ عوام اسلام اور اسلامی قوانین کا نام سنتے ہیں ڈر جاتےہیں، خوف کو اپنا سرمایہ بنا کر فسطائی قوتیں عوام میں غلط فہمیوں کو پیدا کررہی ہیں، سماج میں پھیلی غلط فہمیوں کو دور کرنا ہے تو مسلمان داخلی طورپر اپنے مسائل حل نکالیں ، زندگی کے ہرموڑ پر قرآن سے رہنمائی حاصل کریں، اپنی زندگی کو عملی نمونہ بنانے کی اپیل کی۔ کچی میمن مسجد کے خطیب مولانا حسین صہیب ندوی نے اسلامی شریعت کے عنوان پر اردو میں خطاب کیا۔ کسٹا بینگرے کی انس بن مالک جمعہ مسجد کے خطیب مولانا ساجد مولوی پرپور نے خاندانی زندگی میں شریعت کے عنوان پر خطاب کیا۔ بولنگڑی کی حوا جمعہ مسجد کے خطیب مولاناسید یحییٰ تنگل مدنی نے جلسہ کی صدارت کی۔ جماعت اسلامی ہند منگلورو کے ناظم علاقہ سعید اسماعیل ، صالح محمد سالی ڈائس پر موجود تھے۔ نجیب شاکیب کی تلاوت قرآن سے جلسہ کا آغاز ہوا۔ رحمت اللہ ماسٹر نے نظامت کی۔