منگلورو :9؍نومبر (ایس او نیوز) دیرل کٹے کے قریب کانکیرےمقام پر کھلے کنوؤں کےپانی میں پٹرول کے ذرات پائے جانے کو لےکر قریب کے دیرل کٹے پٹرول بنک کو ایک دن کے لئے بند کیاگیا۔

بیلمے گرام پنچایت حدود کے پہلے وارڈ کانکیرے علاقے کے 4کنوؤں کے پانی میں  گزشتہ تین دنوں  پہلے ایندھن کے ذرات پائے گئے تھے۔ کنوؤں کے پانی میں آگ لگائی جائے تو آگ بھڑک کر جلتی رہی۔ وہیں کنوؤں سے 150میٹر دور اونچائی پر ایک پٹرول بنک ہے، اسی پٹرول بنک سے رسا ہوا پٹرول کنوؤں تک پہنچنے کا مکینوں نے شبہ جتایا ہے۔

علاقہ کے عوام کی شکایت پر فائر برگیڈ کے افسران اور انڈین پٹرول تقسیم کار افسر گوتم  جائے وقوع کا دورہ کیا۔ اس موقع پر بات کرتے ہوئے گوتم نےکہاکہ پٹرول بنک کی جانچ کی گئی ، یہاں کہیں بھی کوئی خامی نظر نہیں آرہی ہے ۔ افسر کا جواب دیتے  ہوئے بیلمے گرام پنچایت کے نائب صدر بی ایم ستار نے کہاکہ جب تک مسئلہ کی بنیادی وجہ کا پتہ نہیں چلتاہے پٹرول بنک بند رکھنے کی صلاح دی۔

پولس کی موجودگی میں پٹرول اور ڈیزل کا حساب لےکر جمعرات کی دوپہر 1بجے سے بنک بند کیاگیا۔ جمعہ کی دوپہر 1بجےپولس نے گرام پنچایت نمائندوں کے سامنے بنک کی دوبارہ جانچ کرنےکا فیصلہ لیاگیاتھا۔ جمعہ کی جانچ کا فیصلہ کیا ہوا ابھی پتہ نہیں چلاہے۔ جب کہ بنک کے مالک سیتارام شٹی کاکہنا ہے کہ 15برس پہلے بجلی گرنے سے پٹرول بنک کی رٹرننگ وال کو نقصان پہنچا تھالیکن ٹینک کو کوئی نقصان نہیں ہواتھا۔ ہم ہر دن ایندھن کا حساب لیتے ہیں۔ انہوں نے بنک کی طر ف سے  کسی غلطی کا امکان نہیں ہونے کا خیال ظاہر کیا۔