منگلورو   :14/ اگست (ایس اؤ نیوز)کیرلا سمیت کرناٹکا کے ساحلی علاقوں  میں طوفانی ہواؤں اور موسلا دھار بارش جاری رہنے سے دکشن کنڑا اور اُڈپی اضلاع زیادہ متاثر ہوئے ہیں۔ لگاتار بارش برسنے سے منگلورو اور بنگلورو قومی شاہراہ  پر پہاڑ کھسک گیا ہے ، جس کی  وجہ سے سواریوں کی  نقل وحمل روک دئیے جانے کے علاوہ بعض مقامات سے  جانی ومالی نقصانات کی جانکاری ملی ہے۔

ڈی سی دفتر میں ڈپٹی کمشنر سسی کانت سینتھل نے  پریس کانفرنس میں  بارش سے ہونے والے حادثات اور نقصانا ت کی جانکاری دیتے ہوئے کہاکہ  شراڑی اور سنپاجے گھاٹ پر قریب 3جگہوں پر پہاڑ کھسکنے سے قومی شاہراہ پر کافی مٹی آگئی ہے، جس سے شاہراہ تقریباً بند ہوگئی تو بنگلورو اور منگلورو کے لئے متبادل روٹ کا انتظام کیاگیا ۔ اس کے لئے خاص کر چارمڑی گھاٹ کے ذریعے سواریوں کو گزرنے کی سہولت فراہم کی گئی ۔ لوگ کسی طرح کی پریشانی میں مبتلا نہ ہوں۔ موصولہ اطلاعات کے مطابق پیر کی رات سے ہی بنگلورو جانے والی سو سے زائد سواریاں ، لاریاں، پرائیویٹ بسیں شراڑی گھاٹ پر کھڑی ہیں، شاہراہ کھلی کرنے کاکام منگل کی شام تک بھی جاری تھا۔

حالات کے پیش نظر  دکشن کنڑا ضلع کے ڈپٹی کمشنر نے عوام سے تعاون کی اپیل کرتے ہوئے ہدایات  جاری کیں کہ جو لوگ نشیبی علاقوں میں رہائش پذیر ہیں وہ محفوظ مقامات پر منتقل ہوجائیں۔ عام طورپر دکشن کنڑا ضلع میں جنوری سے اگست تک 2779.9ملی میٹر بارش ہوتی رہی ہے ، مگر امسال اب تک 3564.0م م بارش کی پیمائش کی گئی ہے جو 128فی صد زائد بارش ہونے کی خبر دے رہی ہے۔ مسلسل بارش کی وجہ سے ابھی تک 11لوگ ہلاک، 11جانور فوت، 1292گھروں کو نقصان ہونے کی جانکاری دی گئی ہے۔ ضلع کی ندیاں بھی خطرے کی سطح سے اوپر بہہ رہی ہیں۔ محکمہ موسمیات کی اطلاع کے مطابق اگلے دو تین ایسے ہی حالات جاری رہیں گے۔ جس کے لئے پیشگی اقدامات کئے  گئے ہیں۔ ماہی گیروں سے کہاگیا ہے کہ کوئی بھی سمندر میں مچھلی شکار کے لئے نہ جائیں۔ندیوں کا نظارہ کرنے لوگ نہ جائیں۔ والدین اپنے بچوں کے متعلق بیدار رہیں۔ اگر مزید بارش جاری رہتی ہے تو اپنے بچوں کو اسکول نہ بھیجیں۔ ضلع  میںٰ قدرتی آفات سے نمٹنے کے لئے 24گھنٹے کام کرے گی ، کبھی بھی کسی وقت کوآفت یا انہونی واقعہ پیش آنے پر فوری طور پر کنٹرول روم نمبر 1077پر جانکاری دینےکی اپیل کی ہے۔