منگلورو ہوائی اڈے سے حج زائرین کی پروازوں کا آغاز : کابینہ وزیر ضمیر احمد خان کی زائرین سے دعا کی درخواست
منگلورو :21/جولائی (ایس اؤ نیوز) منگلورو وہوائی اڈے سے حج کو جانے والے زائرین کو ریاستی کابینہ کے وزیر ضمیر احمد خان نے آج سنیچر کو بجپے انصار اسکول کے صحن سے انہیں وداع کرتے ہوئے کہا کہ وہ اپنے مبارک سفر کے دوران ملک اور ریاست کی بہتری و ترقی اور ملک کے ہندو ، مسلم ، عیسائی ، سکھ سمیت تمام باشندوں کے درمیان بھائی چارگی ، آپسی رواداری کے ساتھ زندگی گزارنے کے لئے دعا کرنے کی درخواست کی۔
انہوں نے بار بار حج جانےو الوں کو صلاح دیتے ہوئے کہاکہ کئی مسلمان ایسے ہیں جو غربت کی وجہ سے حج کی خواہش کے باوجود زیارت نہیں کرسکتے، دھن دولت والے لوگ بار بار حج کرنے کے بجائے ان غریب مسلمانوں کو حج پر بھیجنے کے لئے تعاون کریں تو کارثواب پائیں گے۔
تقریب میں بات کرتے ہوئے شہری ترقیاتی وزیر یو ٹی قادر نے ملک میں بہترین اور خیر سگالی والے سماج کی تعمیر کے لئےدعا کرنے کی زائرین سے درخواست کی۔ اُڈپی ضلع کے قاضی پی ایم ابراہیم مسلیار بیکل نے بھی حج کی اہمیت پر بات کی۔ اور حج زائرین کے درمیان دستاویزات کی تقسیم کی۔ مہمان خصوصی کے طورپر منگلورو حج نگراں کمیٹی کے صدر وائی کے محمد کوئیں ، ودھان پریشد کے رکن بی ایم فاروق، سابق رکن اسمبلی محی الدین باوا، حج کمیٹی کے ممبر ابوبکر ، سنٹرل کمیٹی کے صدر کے ایم مسعود ، سابق اعلیٰ پولس آفیسر جی اے باواسمیت کئی ذمہ داران شریک تھے۔ حج کمیٹی کے نگراں افسر سرفراز خان سردار نے استقبال کیا۔
امسال منگلورو ہوائی اڈے سے کل 431 زائرین حج کی زیارت کے لئے اڑان بھریں گے، جس میں آج 144زائرین کی پہلی بیچ کو وزیر موصوف نے ہری جھنڈی دکھائی۔ اسی طرح اتوار کو 144،پیر کو 143زائرین حج کے لئے ہوائی جہاز کے ذریعے روانہ ہونگے۔