بھٹکل 28/ستمبر (ایس او نیوز) تین دن کی تلاش کے بعد 42 سالہ کرناٹک اسٹیٹ روڈ ٹرانسپورٹ کارپوریشن کے کنڈیکٹر دیوداس کی لاش اس مقام سے دو کلو میٹردور پائی گئی، ماہر غوطہ خوروں اور فائر اینڈ ایمرجنسی سرویسیس کے اہلکاروں نے آج دوپہردیوداس کی لاش کو پایا۔ لاش کو پوسٹ مارٹم کے لئے قریبی سرکاری اسپتال منتقل کردیا گیا۔

خیال رہےکہ بس کنڈیکٹراورایک خاتون مسافر کے درمیان  ٹکٹ کے باقی پیسے واپس دینے کے موضوع پر ایک سو او رپانچ سو روپے کے نوٹ کا تنازعہ کھڑا ہواتھا دیوداس کا کہنا تھا کہ خاتون نے سو روپئے دئے، جبکہ خاتون کا کہنا تھا کہ اُس نے پانچ سو روپئے دئے۔ان دونوں کا جھگڑا کباڈا پولس تھانہ تک گیا۔ جس نے ان دونوں میں مفاہمت کروائی۔

اسی دوران دیوداس کے بیٹے پون نے کباڈا پولس پراپنے والد کی بے عزتی کرنے کا الزام لگایا جس کا ۲۲ سال کی سرویس میں بہترین ریکارڈ رہا ہے۔ دیوداس نے گذشتہ سال بیسٹ کنڈیکٹر کا ایوارڈ بھی حاصل کیا تھا۔ کباڈا پولس نے اس الزام کی تردید کی اور کہا کہ اس نے دونوں کے درمیان دس منٹ کے اندر مفاہمت کرائی تھی۔ اس دوران خبر ملی ہے کہ سپرنٹنڈنٹ آف پولس بھوشن گلاب رائے نے ایڈیشنل سپرنٹنڈنٹ آف پولس سی بی ویدا مورتھی سے خواہش کی ہے کہ کباڈا پولس کے خلاف الزامات کی جانچ کی جائے۔