منگلوروکے سمندر میں ماہی گیر کشتی ڈوب گئی۔8مچھیروں کو بچالیا گیا
منگلورو11؍دسمبر(ایس او نیوز) منگلورو کے قریب سمندر میں ’مدر انڈیا‘ نامی ایک ماہی گیر ٹراولر بوٹ غرقاب ہوگئی ، مگر خوش قسمتی سے اس پر موجود تمام8ماہی گیروں کو بچا لیا گیا۔
پتہ چلا ہے کہ منگلورو کی قدیم بندرگاہ سے تعلق رکھنے والی یہ بوٹ چار روز قبل سمندر میں ماہی گیری کے لئے نکلی تھی۔اورگہرے سمندر میں 50تا60 کیلو میٹرکے فاصلے پر ماہی گیری کے دوران کشتی کے انجن میں تکنیکی خرابی پیداہوگئی۔اس کے بعد کشتی میں موجود ماہی گیرو ں نے مدد طلب کی توقریبی علاقے میں ماہی گیری کررہی دیگر تین تا چار کشتیوں نے آگے بڑھ کرمشکل میں پھنسے ہوئے تملناڈو کے ماہی گیروں کو ’سہارا‘ نامی بوٹ میں منتقل کیا۔ بقیہ کشتیوں نے بگڑے ہوئے انجن والی کشتی’مدرانڈیا‘ کو کنارے تک کھینچ کر لانے کی کوشش کی مگر وہ اس میں ناکام رہے اور وہ کشتی سمندر میں غرقاب ہوگئی۔