منگلورو:20/مارچ(ایس اؤ نیوز) منگلورو بین الاقوامی ہوائی اڈے (ائیرپورٹ) کے ذریعے بے شمار مسلمان ملک اور بیرون ملک کا سفرکرتے ہیں،ہوائی اڈے پر مسلمانوں کو نماز کے لئے جگہ مختص کرتےہوئے انہیں سہولت فراہم کرنے کے لئے ائیرپورٹ اتھارٹی کی طرف سے قدم اٹھائے جانےکی اطلاعات موصول ہوئی ہے۔
ریاستی کابینہ کے وزیر برائے پرائمری اور ہائی اسکول تنویر سیٹھ نے 16فروری کو ائیرپورٹ اتھارٹی کے ڈائرکٹر کو خط لکھتےہوئے اس سلسلے میں اقدام کرنے کو کہا تھا۔ اسی کے تحت اتھارٹی نے ہوائی اڈے کے اندر نماز کے لئے سہولت مہیا کرنے کا اقدام کررہی ہے، جب کہ بنگلورو کے بین الاقوامی کیمپے گوڈا ہوائی اڈے پر اتھارٹی نے اس کی سہولت فراہم کرچکی ہے۔ اس سلسلے میں اخبارنویسوں سے بات کرتے ہوئے اتھارٹی کے ڈائرکٹر رادھا کرشنا نے کہاکہ موصوف وزیر صاحب نے اس طرف توجہ دلائی تھی ، اگلے دو ہفتوں میں نماز کے لئے سہولت فراہم کئے جانے کی بات کہی۔
مسلمانوں پر پانچ وقت کی نماز فرض ہے ، منگلورو ہوائی اڈے کے ذریعے روزانہ سیکڑوں مسلمان ملک اور بیرون ملک کے مختلف مقامات کے لئے سفر کرتےرہتے ہیں، لیکن وقت پر نماز ادا کرنے کے لئے یہاں کوئی مناسب سہولت نہیں تھی ، اس سلسلے میں وزیر تنویرسیٹھ نے اتھارٹی کو توجہ دلائی ، اور اتھارٹی نے اس پر مثبت انداز میں کام کرتے ہوئے نماز کے لئے جگہ مختص کرنے کی طرف قدم بڑھایا ہے، تو شہر کی معزز شخصیات، لیڈران اور علماء حضرات نے وزیر موصوف اور اتھارٹی کے ڈائرکٹر دونوں کا شکریہ اداکیاہے۔