منگلورو میں گانجہ سپلائی کرنے کے الزام میں 8 طلبا گرفتار
منگلورو:13؍جنوری (ایس او نیوز) شہر کے مختلف کالجوں میں زیر تعلیم طلبا اور عوام کو گانجہ سپلائی کرنےکےالزام میں منگلورو سی سی بی پولس اور اکنامک اینڈ نارکوٹک کرائم پولس نے مشترکہ کارروائی کرتے ہوئے کیرلا سے تعلق رکھنے والے 8نوجوانوں کو گانجہ سمیت گرفتارکرلیا ہے۔
گرفتارشدگان کی شناخت کیرلا کے کولم ضلع کریپر دیہات کے رہنے الے اکشیا کے پرساد(22)، کنور کے نمیل (21)،امیت شری وتسن (21)، اشوین (21)، آکاش ایس نائر (23)، اکشئے (22)، محمد امیر (22) اور منگلورو کے جعفر(22) کی گئی ہے، یہ سبھی ملزمین مینگلور کے کدری میں مقیم تھے۔ پتہ چلا ہے کہ ان میں 7 طلبا شہر کی دو انجنئیرنگ کالج میں زیر تعلیم ہیں تو ایک فزیوتھراپی کالج کا متعلم ہے۔
شہر کے مورگن گیٹ کے قریب والے میدان میں عوام اور طلبا کو گانجہ بیچنے اور گانجہ پینے کی مصدقہ خبر پرسی سی بی پولس اور اکنامک اینڈ نارکوٹک پولس نے مشترکہ کارروائی کرتے ہوئے ملزموں کو گرفتار کیا ہے۔ ملزمان سے 12ہزارروپئے مالیت کا 500گرام گانجہ، 8موبائیل فون، 4050روپئے نقد اور دو بائک ضبط کرلئے گئے ہیں۔ ضبط شدہ اشیاء کی کل مالیت 1،69،050روپئے بتائی گئی ہے۔ کارروائی میں سی سی بی کے انسپکٹر شانتارام، اکنامک اینڈ نارکوٹک کرائم تھانہ کے انسپکٹر رام کرشنا اور سی سی بی کے پی ایس آئی کبال راج سمیت عملہ شریک تھا۔